तेह्रथुम : तेह्रथुमको लालीगुराँस नगरपालिका–९ स्थित कालिका आधारभूत विद्यालयलाई सेनेहाङ परिवार र युकेमा रहेका पूर्व–लाहुरेहरूको समूहले संयुक्त रूपमा करिब दुई लाख रुपैयाँ बराबरको शैक्षिक, खेलकुद तथा अतिरिक्त सामग्री सहयोग गरेको छ।
विद्यालयमा आयोजित औपचारिक कार्यक्रममा खड्कबहादुर–दौमन्त कुमारी सेनेहाङ स्मृति प्रतिष्ठानले १ सय ६ जना विद्यार्थीलाई करिब ६० हजार रुपैयाँ बराबरका शैक्षिक तथा खेलकुद सामग्री हस्तान्तरण गरेको हो।
साथै, विद्यालयमा पुस्तकालय स्थापना गर्न ५० हजार रुपैयाँ नगद सहयोग गरिएको प्रतिष्ठानकी सदस्य कमला सेनेहाङले जानकारी दिइन्।
प्रतिष्ठानले यसअघि विद्यालयमा २ लाख रुपैयाँको अक्षयकोष स्थापना गरेको थियो।
परिवारका सदस्यहरूले करिब १० लाख रुपैयाँ बराबरको अक्षयकोष स्थापना गरेको र त्यसबाट प्राप्त ब्याजमार्फत हरेक वर्ष सामाजिक तथा शैक्षिक क्षेत्रमा निरन्तर सहयोग गर्दै आएको जनाइएको छ।
कार्यक्रमको अध्यक्षता स्व. खड्गबहादुर र स्व. दौमन्त सेनेहाङका माइलो छोरा सष्टिका सेनेहाङले गरेका थिए भने लालीगुराँस नगरपालिकाका प्रमुख अर्जुन माबुहाङ प्रमुख अतिथि रहेका थिए।
नगर प्रमुख माबुहाङले शैक्षिक विकासमा समुदाय, विद्यालय र दातृ संस्थाबीचको सहकार्य आवश्यक रहेको भन्दै भूतपूर्व लाहुरेहरूको देशप्रेम, त्याग र सहयोग भावना नै ग्रामीण क्षेत्रमा यस्ता प्रेरणादायी कार्यक्रम सम्भव बनाउने आधार रहेको बताए ।
विद्यालयका प्रध्यानाध्यापक डिल्ली रेग्मीका अनुसार प्राप्त सहयोगले विद्यालयको शैक्षिक गुणस्तर वृद्धि, सह–पाठ्यक्रम क्रियाकलाप विस्तार तथा विद्यार्थीहरूको प्रतिभा विकासमा महत्वपूर्ण मद्दत पुगेको छ।
सोही कार्यक्रममा युकेबाट आएका पूर्व–लाहुरे तथा प्रवासी नेपालीहरूको समूह (‘लिजेण्ड ईस्टर्न नेपाल इन्जिनियरिङ पल्टन’) ले विद्यालयलाई करिब ९० हजार रुपैयाँ बराबरको साउण्ड सिस्टम, नृत्यका सामग्री तथा अन्य शैक्षिक सामग्री हस्तान्तरण गरेको टोली संयोजक खड्कहाङ लिम्बूले बताए।
उक्त सहयोगी टोलीमा कमला सेनेहाङ, खड्कहाङ लिम्बू, हिमाल प्रधान, लक्ष्मी प्रधान, दीपक हमाल, मञ्जु हमाल, आनन्द पुन, डा. सुमिन्द्रा पुन, गुण गुरुङ, बेनु गुरुङ, भोज गुरुङ, गिता गुरुङसहित सहभागी थिए।
विद्यालयले दाताहरूप्रति आभार व्यक्त गर्दै कार्यक्रम उत्साहपूर्ण वातावरणमा सम्पन्न भएको जनाएको छ।
Discussion about this post