विराटनगर : विराटनगरमा स्कुटर दुर्घटना हुँदा एक जना युवकको मृत्यु भएको छ।
विराटनगर महानगरपालिका–१४ स्थित बीआर ३८ एम ११७८ नम्बरको स्कुटर मंगलबार राति करिब १०ः२० बजेतिर आफैं अनियन्त्रित भएर दुर्घटनामा परेको प्रहरीले जनाएको छ।
जोगवनीतर्फ जाँदै गरेको स्कुटर दुर्घटनामा चालक भारतको अररिया जिल्ला छोटी मस्जिदका २५ वर्षीय मोहमद राजाको मृत्यु भएको हो।
दुर्घटनामा पछाडि सवार भारत अररिया सोही स्थानका २० वर्षीय मोहमद इमरान गम्भीर घाइते भएका छन्।
दुवै जनालाई उपचारका लागि कोशी अस्पताल विराटनगर लगिएकोमा अस्पताल पुर्याउनासाथ चिकित्सकले राजालाई मृत घोषित गरेका थिए। इमरानको उपचार जारी रहेको प्रहरीले जनाएको छ।
प्रहरीका अनुसार तीव्र गतिका कारण स्कुटर दुर्घटना भएको प्रारम्भिक अनुमान गरिएको छ। घटनाबारे थप अनुसन्धान भइरहेको प्रहरीको भनाइ छ।
Discussion about this post