इटहरी : झापाको दमकस्थित आस्था कलेजले इटहरीमा जारी तेस्रो अन्तर कलेज टी–२० क्रिकेट प्रतियोगितामा विजयी सुरुवात गरेको छ।
बुधबार भएको पहिलो खेलमा आस्था कलेजले विराटनगरको महेन्द्र मोरङ क्याम्पसलाई ११ रनले पराजित गर्दै प्रतियोगिताको सुरुआत जितसँगै गरेको हो। समूह ‘डी’ मा रहेको महेन्द्र मोरङ क्याम्पसको यो हारसँगै सेमिफाइनल यात्रा कठिन बनेको छ।
इटहरीस्थित जनता क्रिकेट पार्कमा १३ ओभरमा छोटाइएको खेलमा आस्था कलेजले प्रस्तुत गरेको ८५ रनको लक्ष्य पछ्याएको महेन्द्र मोरङ क्याम्पसले ९ विकेट गुमाउँदै ७३ रन मात्र बनाउन सक्यो।
महेन्द्र मोरङका आइन्स्टाइन रिजालले २१ र बियुस बस्नेतले १४ रन बनाए भने अन्य ब्याटर दोहोरो अंकमा पुग्न सकेनन्।
यसअघि टस हारेर पहिले ब्याटिङ गरेको आस्था कलेजले १३ ओभरमा ७ विकेटको क्षतिमा ८४ रन बनाएको थियो। आस्थाका आर्यन स्वर्णले २७ र रुजल सुन्दासले अविजित १४ रनको योगदान दिए।
यस्तै, बुधबार नै भएको दोस्रो खेलमा नमुना कलेजले जनता बहुमुखी क्याम्पस, इटहरीलाई ५९ रनले पराजित गर्दै सेमिफाइनलमा स्थान सुरक्षित गरेको छ। समूह ‘ए’ मा रहेको नमुना कलेजको यो लगातार दोस्रो जित हो।
टस जितेर पहिले ब्याटिङ गरेको नमुना कलेजले १५ ओभरमा छोटाइएको खेलमा ८ विकेट गुमाउँदै १ सय २७ रन बनायो। नमुनाका राजु विकले सर्वाधिक ६५ रन बनाए भने सक्षम ढकालले २१ रन जोडे।
जवाफमा १ सय २८ रनको लक्ष्य पछ्याएको जनता बहुमुखी क्याम्पस ११ दशमलव २ ओभरमै ६८ रनमा समेटियो।
जनता बहुमुखीका सुमन पौडेलले २२ र आभास गेलालले १३ रन बनाए भने ६ जना ब्याटर खाता नै खोल्न सकेनन्। नमुना कलेजका सुबित मेहताले ६ विकेट लिँदा प्रकाश कार्कीले २ विकेट हात पारे।
पुस २६ गतेसम्म सञ्चालन हुने प्रतियोगितामा कोसी प्रदेशका झापा, मोरङ र सुनसरीका १२ कलेज सहभागी छन्। प्रतियोगिता सुनसरी जिल्ला क्रिकेट संघको प्राविधिक सहयोगमा सञ्चालन भइरहेको छ।
प्रतियोगिताले कोशी प्रदेशका कलेजहरूबीचको क्रिकेट प्रतिभा उजागर गर्दै खेलकुदमार्फत शैक्षिक क्षेत्रलाई समेत प्रोत्साहन गर्ने लक्ष्य लिएको आयोजक इटहरी आदर्श जाइन्ट्सका अध्यक्ष भूपाल लुइँटेलले बताए।
Discussion about this post