इटहरी : नेकपा (एमाले)ले पार्टी अनुशासन उल्लंघनको आरोपमा ६ महिनाका लागि निलम्बनमा परेका इटहरी उपमहानगरपालिकाका पूर्वमेयर द्वारिकलाल चौधरीलाई सुनसरी निर्वाचन क्षेत्र नं. २ को निर्वाचन कमाण्डरको जिम्मेवारी दिएको छ।
निलम्बन फुकुवा गर्दै चुनावी मैदानमा सक्रिय भूमिकामा खटाइएको हो।
एमालेले सुनसरी–२ बाट सुजन लामालाई प्रतिनिधिसभा सदस्यको उम्मेदवार बनाएको छ।
चौधरीलाई चुनावी कमाण्डरको जिम्मेवारी दिएसँगै क्षेत्रको चुनावी समीकरण एमालेको पक्षमा भारी पर्न सक्ने आकलन राजनीतिक वृत्तमा हुन थालेको छ।
चौधरीको प्रभावशाली संगठन क्षमता र समुदायमा रहेको पकडलाई मध्यनजर गर्दै पार्टीले उनलाई केन्द्रीय भूमिकामा ल्याएको स्रोतको भनाइ छ।
एमाले कोशी प्रदेश कमिटीले यसअघि अनुशासन उल्लंघनको आरोपमा चौधरीलाई ६ महिनाका लागि पार्टी सदस्यताबाट निलम्बन गर्दै जिम्मेवारीबाट मुक्त गरेको थियो।
तर, निर्वाचन नजिकिँदै जाँदा पार्टीले उनको निलम्बन फुकुवा गर्दै सुनसरी-२ मा पार्टी उम्मेदवारलाई जिताउने स्पष्ट जिम्मेवारी दिएको हो।
चौधरी इटहरीका पूर्वमेयर एवम् एमाले सुनसरीका पूर्व अध्यक्षसमेत हुन्। यसअघि कारबाहीको समयमा उनले पार्टीभित्रको गुटबन्धन र दुराग्रहका कारण आफूलाई योजनाबद्ध रूपमा कारबाही गरिएको दाबी गरेका थिए।
उनले केपी शर्मा ओलीको कार्यशैलीको आलोचना गर्दै आएको कारण आफू निशानामा परेको बताएका थिए।
विवादित कार्यकाल र राजनीतिक उतारचढाव
२०७४ सालको स्थानीय तह निर्वाचनमा एमालेबाट इटहरी उपमहानगरपालिकाको मेयर निर्वाचित चौधरीको कार्यकाल विवादले भरिएको थियो।
पत्रकारलाई दुर्व्यवहार, सेवाग्राहीलाई कार्यालयमै थुन्ने, सामाजिक सञ्जालमा आपत्तिजनक टिप्पणी गर्ने लगायतका आरोप उनीमाथि लाग्दै आएका थिए।
२०७९ को निर्वाचनमा एमालेबाट टिकट नपाएपछि असन्तुष्ट बनेका चौधरी माओवादी केन्द्र प्रवेश गरी सुनसरी-२ (क)बाट प्रदेशसभा उम्मेदवार बनेका थिए। कांग्रेससहितको गठबन्धनको समर्थन हुँदाहुँदै पनि उनी एमाले उम्मेदवार रेवतीरमण भण्डारीसँग पराजित भए।
पराजयपछि केही समय राजनीतिक रूपमा निष्क्रिय देखिएका चौधरी करिब नौ महिनापछि पुनः एमालेमै फर्किएका थिए। ०८० असोजमा अध्यक्ष ओलीलाई भेटेपछि उनी औपचारिक रूपमा एमालेमा पुनः सक्रिय बनेका थिए।
त्यसपछि ०८१ भदौमा उनलाई एमाले कोशी प्रदेश कमिटी सदस्यमा मनोनीत गरिएको थियो।
चुनावी प्रभाव कति ?
द्वारिकलाल चौधरीलाई निर्वाचन कमाण्डर बनाउनु एमालेको जोखिम र अवसर दुवै भएको विश्लेषण भइरहेको छ।
समर्थकहरूले उनलाई ‘निर्णायक खेलाडी’ मानिरहेका छन् भने विपक्षी दलहरू भने उनको विगत र विवादित छविलाई मुद्दा बनाउन सक्ने संकेत देखिन्छ।
तर, स्थानीय संगठन र समुदायमा उनको पकडलाई हेर्दा सुनसरी-२ को चुनावमा उनको भूमिका निर्णायक हुन सक्ने आँकलन गरिएको छ।
Discussion about this post