भोजपुर : आसन्न निर्वाचन सुरक्षामा खटिएको नेपाली सेनाको बस भोजपुरमा दुर्घटना हुँदा २६ जना घाइते भएका छन्।
भोजपुर नगरपालिका–३ गुप्तेश्वरको नाम्ताङ (सेतीबगर)स्थित पुष्पलाल मध्यपहाडी लोकमार्गमा बा ४ ख ७३१७ नम्बरको बस सडकबाट करिब ५ सय मिटर तल खसेको हो।
टेम्केमैयुङ गाउँपालिकाको स्थलगत अनुगमन सकेर फर्कँदै गरेको सेनाको टोली बोकेको बस दुर्घटनामा परेको प्रहरीले जनाएको छ।
बसमा सवार नेपाली सेनाका २३ जना, एक जना सहयोगी, चालक र सहचालक गरी कुल २६ जना घाइते भएका छन्। घाइतेमध्ये ८ जनाको अवस्था गम्भीर रहेको बताइएको छ।
दुर्घटनापछि घाइतेहरूलाई तत्काल जिल्ला अस्पताल भोजपुर पुर्याइएको थियो।
गम्भीर घाइतेलाई नेपाली सेनाको हेलिकप्टरमार्फत काठमाडौँ रेफर गरिएको छ भने अन्य घाइतेहरूको जिल्ला अस्पतालमै उपचार भइरहेको छ।
जिल्ला प्रहरी कार्यालय भोजपुरका डीएसपी राजु लामाका अनुसार दुर्घटनाको कारण खुल्न बाँकी रहेको छ। प्रहरीले घटनाबारे थप अनुसन्धान भइरहेको जनाएको छ।
Discussion about this post