विराटनगर : झापा र मोरङबाट लागूऔषधसहित पाँच जनालाई प्रहरीले पक्राउ गरेको छ ।
झापाको कन्काई नगरपालिका–३ स्थितबाट चेकजाँचको क्रममा इलाका प्रहरी कार्यालय सुरुङ्गाले ६ ग्राम ६८० मिलिग्राम ब्राउनसुगरसहित शिवसताक्षी नगरपालिका–१० का प्रदीप तामाङ, दमक–१ का विक्रम ढकाल र इलाम माईजोगमाई गाउँपालिका–५ की मेरी राईलाई नियन्त्रणमा लिएको छ ।
चेकजाँचकै क्रममा मेचीनगर नगरपालिका–६ बाट लागूऔषध नियन्त्रण ब्युरो काँकडभिट्टाले मेचीनगर–९ का आरएन राईलाई १ ग्राम ६८० मिलिग्राम ब्राउनसुगरसहित नियन्त्रणमा लिएको छ ।
त्यसैगरी मोरङको इलाका प्रहरी कार्यालय उर्लाबारीले उर्लाबारी नगरपालिका–२ का विनोद मगरलाई ८७० मिलिग्राम ब्राउनसुगर र चरेस १ ग्राम ३० मिलिग्रामसहित पक्राउ गरेको छ ।
लागूऔषधसहित पक्राउ परेका उनीहरूको सम्बन्धमा थप अनुसन्धान भइरहेको कोशी प्रदेश प्रहरी कार्यालय विराटनगरले जनाएको छ ।
Discussion about this post