इटहरी : कोशी प्रदेश सरकारले समस्याग्रस्त घोषित इटहरीस्थित अम्बे–कोशी बचत तथा ऋण सहकारी संस्था लिमिटेडका पीडित बचतकर्तालाई रकम फिर्ता गर्न सुरु गरेको छ।
कोशी प्रदेशको उद्योग, कृषि तथा सहकारी मन्त्रालयअन्तर्गत गठित समस्याग्रस्त सहकारी व्यवस्थापन समितिले पहिलो चरणमा साना बचतकर्तालाई प्राथमिकतामा राख्दै रकम वितरण थालेको हो।
उक्त सहकारीमा ९ हजार ४ सय ९२ जना बचतकर्ताको कुल ४२ करोड ६० लाख ९८ हजार ९६९ रुपैयाँ बचत रहेको छ भने ६४२ जना ऋणीमार्फत ४१ करोड ९३ लाखभन्दा बढी ऋण लगानी भएको देखिन्छ।
संस्थाका तत्कालीन अध्यक्ष फणिन्द्र बहादुर पूर्वछाने एक्लैले करिब २० करोड रुपैयाँ ऋण लिएको खुलेको छ। उनी हाल कारागारमा छन्।
समितिले सञ्चालक तथा अपचलनमा संलग्न व्यक्तिहरूको नाममा रहेको ४२ वटा जग्गा रोक्का गरिसकेको छ भने थप सम्पत्ति खोजी र कानुनी प्रक्रिया अघि बढाइरहेको छ।
हालसम्म १ हजार १७३ जना बचतकर्ताले २४ करोड ८८ लाखभन्दा बढी रकम दाबी गरेका छन्। बैंकमा रहेको रकम र ऋण असुलीबाट उठेको करिब १ करोड ३८ लाख रुपैयाँबाट अहिले वितरण सुरु गरिएको हो।
समितिका अनुसार रकम वितरण तीन चरणमा हुनेछ। पहिलो चरणमा २० हजार रुपैयाँसम्म बचत गरेका ३०८ जना साना बचतकर्तालाई नगद फिर्ता गरिँदैछ। दोस्रो चरणमा १ लाख रुपैयाँसम्म बचत गर्ने करिब ६०० जना बचतकर्तालाई राहत दिने योजना छ।
तेस्रो चरणका लागि प्रदेश सरकारले विनियोजन गरेको २ करोड रुपैयाँको चक्रीय कोष प्राप्त हुने प्रतीक्षामा समिति रहेको छ। उक्त कोष उपलब्ध भएपछि सबै दाबीकर्तालाई समेट्ने गरी राहत वितरण गरिने बताइएको छ।
ऋण असुलीलाई प्रभावकारी बनाउन समितिले ‘मिलापत्र’को प्रक्रिया अघि बढाएको छ, जसअन्तर्गत हालसम्म ५ वटा मिलापत्र सम्पन्न भइसकेका छन् भने ९ वटा धितो फुकुवा गरिएको छ। यसले ऋणीहरूलाई ऋण तिर्न सहज भएको र असुली प्रक्रिया तीव्र बनेको समिति बताउँछ।
समितिले सहकारी डुबाउने सञ्चालकहरूलाई जिम्मेवार बनाउने कडा नीति लिँदै सबै सञ्चालकहरूको सम्पत्ति रोक्का गरेको छ। संस्थाको हिसाब फरफारक नभएसम्म उनीहरूलाई उन्मुक्ति नदिइने स्पष्ट पारिएको छ।
प्रदेश सरकारको सक्रियता र साना बचतकर्तालाई प्राथमिकता दिने रणनीतिले सहकारी पीडितहरूमा केही आशा जगाएको छ। देशभर ३१ वटा सहकारी समस्याग्रस्त घोषणा भएको अवस्थामा कोशी प्रदेशले सुरु गरेको यो पहललाई नमुना अभ्यासका रूपमा हेरिएको छ।
Discussion about this post