धनकुटा : धनकुटामा यात्रुवाहक विंगर गाडी दुर्घटना हुँदा एक महिलाको मृत्यु भएको छ भने दुई जना घाइते भएका छन् ।
निर्माणाधीन तमोर करिडोरअन्तर्गत चौबिसे गाउँपालिका–४ बिजीटारमा बिहान करिब ९ः३० बजेतिर प्रदेश १–०१–००१ ज ३९४९ नम्बरको विंगर गाडी दुर्घटनामा परेको हो ।
जिल्ला प्रहरी कार्यालय धनकुटाका प्रहरी उपरीक्षक शरतकुमार थापा क्षेत्रीका अनुसार इटहरीबाट पाँचथरतर्फ जाँदै गरेको उक्त गाडी दुर्घटनामा पर्दा मोरङको सुन्दरहरैँचा नगरपालिका–६ की ४० वर्षीया सावित्रा ढुंगेलको मृत्यु भएको हो ।
दुर्घटनापछि गाडीले च्यापेको अवस्थामा ढुंगेललाई फेला पारिएको प्रहरीले जनाएको छ । उद्धार गरेर बाहिर निकाल्दा उनको मृत्यु भइसकेको प्रहरीको भनाइ छ ।
दुर्घटनामा गाडी चालक पाँचथरको फाल्गुनन्द गाउँपालिका–१ का अन्दाजी २८ वर्षीय तेजकुमार तेम्जोङ र ताप्लेजुङको फुङलिङ नगरपालिका–८ का अन्दाजी २२ वर्षीय दिपेन रसाइली घाइते भएका छन् ।
घाइते दुवै जनालाई उद्धार गरी उपचारका लागि धरानस्थित बीपी कोइराला स्वास्थ्य विज्ञान प्रतिष्ठान पठाइएको प्रहरीले जनाएको छ ।
घटनाबारे थप अनुसन्धान भइरहेको प्रहरीले जनाएको छ ।
Discussion about this post