झापा : आफ्नै छोरीमाथि जबरजस्ती करणी गरेको आरोप लागेका तथा जन्मिएको नवजात शिशुको शव गाडेर फरार भएका एक अभियुक्तलाई प्रहरीले तीन महिनापछि पक्राउ गरेको छ।
झापा प्रहरीले विशेष सुराकी र प्राविधिक अनुसन्धानको सहायताले फरार प्रतिवादीलाई इलामको सूर्योदय नगरपालिका–१० फिक्कलस्थित एक होटलबाट पक्राउ गरेको हो। प्रहरीका अनुसार उनी घटना सार्वजनिक भएयता विभिन्न जिल्लामा लुक्दै हिँडिरहेका थिए।
जिल्ला प्रहरी कार्यालय झापाका सूचना अधिकारी प्रहरी नायब उपरीक्षक रञ्जन अवाका अनुसार अभियुक्तलाई पीडित छोरीसँगै बसिरहेको अवस्थामा जिल्ला प्रहरी कार्यालय इलामको समन्वयमा नियन्त्रणमा लिइएको हो।
प्रहरी अनुसन्धानअनुसार घटनापछि अभियुक्त झापाबाट फरार भएर रोल्पा पुगेका थिए। त्यहाँ उनको खोजी भइरहेकै बेला उनी पुनः स्थान परिवर्तन गर्दै इलाम पुगेका थिए। करिब तीन महिनादेखि फरार रहेका उनलाई पक्राउ गर्न प्रहरीले विभिन्न जिल्लासँग समन्वय गरी निगरानी बढाएको थियो।
यो घटना वैशाख २ गते झापाको झिलझिले क्षेत्रमा नवजात शिशुको शव गाडिएको अवस्थामा फेला परेपछि बाहिर आएको थियो। घटनाको अनुसन्धानका क्रममा किशोरीले आफ्नै बुबाबाट यौन हिंसा भएको र बच्चा जन्मिएपछि शव गाड्न बाध्य बनाइएको बयान दिएको प्रहरीले जनाएको छ।
त्यसपछि प्रहरीले नवजात शिशुको मृत्यु र हाडनाता करणी सम्बन्धी कसूरमा छुट्टाछुट्टै मुद्दा दर्ता गरी अदालतबाट पक्राउ अनुमति लिएको थियो। तर अभियुक्त फरार भएपछि अनुसन्धान चुनौतीपूर्ण बनेको थियो।
प्रहरीका अनुसार पक्राउ परेका प्रतिवादीमाथि झापा जिल्ला अदालतबाट म्याद थप गरी थप अनुसन्धान भइरहेको छ। पीडितलाई भने संरक्षण र पुनःस्थापनाका लागि सुरक्षित आवासमा राखिएको जनाइएको छ।
Discussion about this post