सुनसरीको बराहक्षेत्र १ कटहरेस्थित आफ्नै घरमा मृत अवस्थामा फेला परेकी १२ बर्षीया बालिकाको १५ बर्षीय बालकले हत्या गरेको पुष्टि भएको छ ।
हिजो शनिबार १२ बर्षीया मीना राई आफ्नै घरमा मृत अवस्थामा फेला परेकी थिईन् । छिमेकीको घरमा धामी हेरेर फर्केकी मीनाको हत्यामा स्थानीय १५ बर्षीय बालक संलग्न भएको प्रहरीले जनाएको छ ।
घरमा बालिका मात्र एक्लै भएको बेला राती १० बजे तिर ती बालक चटपटे किन्न पुगेको र दुवैबीच बादविबाद हुँदा ती बालकले हत्या गरेको अनुसन्धानबाट खुलेको छ । प्रहरीका अनुसार ती बालकले सिसाको बोत्तलले मीनाको टाउकोमा प्रहार गरी भेष्ट र रुमालले घाँटीमा कसेर हत्या गरेका थिए ।
मीनाको हत्यापछि आफ्नै घरमा गएर सुतेको वयान सोधपुछको क्रममा ती बालकले प्रहरीलाई दिएका छन् ।
घटनामा खटिएको प्रहरी टोलीले मृत बालिकाको शव संकास्पद देखिएपछि अनुसन्धान शुरु गरेको थियो । घटनाको अनुसन्धान गर्न संघीय प्रहरी ईकाइ कार्यालय धरानबाट “लैला” नामको कुकुरसहितको टोली र जिल्ला प्रहरी कार्यालय सुनसरीबाट प्रहरी टोली खटेको थियो ।
पक्राउ परेका बालकलाई मुलुकी अपराध (संहिता ऐन) २०७४ को ज्यान सम्वन्धी कसुरमा सुनसरी जिल्ला अदालतवाट ५ दिनको म्याद थप भएको र घटनाबारे थप अनुसन्धान भईरहेको जिल्ला प्रहरी कार्यालय सुनसरीले जनाएको छ ।
Discussion about this post