मोरङ : म्याद गुज्रिएका ग्यास सिलिन्डरमा नयाँ सिल लगाएर बिक्रीका लागि राखेको भेटिएपछि मोरङको बुढीगंगास्थित रिजालको भान्छा ग्यास उद्योग प्रालिलाई कारबाही गरिएको छ।
जिल्ला प्रशासन कार्यालय मोरङको नेतृत्वमा गरिएको बजार अनुगमनका क्रममा उद्योग परिसरमा म्याद गुज्रिएका दुईवटा सिलिन्डरमा समेत सिल लगाएर बिक्रीका लागि तयारी अवस्थामा राखिएको भेटिएको हो।
अनुगमन टोलीले उद्योगमा रहेका १९ सिलिन्डरमध्ये ११ वटाको तौल परीक्षण गर्दा एउटा सिलिन्डरमा २४० ग्राम ग्यास कम रहेकोसमेत पाइएको थियो।
सिलिन्डरको म्याद सकिएपछि पुनः प्रयोग गर्न नपाइने भए पनि ती सिलिन्डरमा सिल लगाएर बजारमा पठाउने तयारी गरिएको पाइएपछि उद्योगलाई सुरक्षा संवेदनशीलतामा खेलबाड गरेको ठहर गर्दै २ लाख ९५ हजार रुपैयाँ जरिबाना गरिएको प्रशासनले जनाएको छ।
अनुगमनका क्रममा बरामद दुईवटा म्याद गुज्रिएका सिलिन्डरको सिल तोडी नष्टसमेत गरिएको छ।
यसै क्रममा विराटनगर महानगरपालिका–३ स्थित कञ्चनश्वर ग्यास पसललाई पनि अनुगमनमा असहयोग गरेको भन्दै १५ हजार रुपैयाँ जरिबाना गरिएको छ।
ग्यास उद्योगमा अनियमितता भेटिने क्रम बढेपछि प्रशासनले एलपी ग्यासको तौल, सिलिन्डरको म्याद तथा सुरक्षा मापदण्डलाई केन्द्रमा राखेर अनुगमन तीव्र बनाएको जनाएको छ।
यसअघि बुढीगंगा–४ स्थित कोशी ग्यास उद्योगलाई कम तौलको ग्यास बिक्री गरेको भेटिएपछि २ लाख ९० हजार रुपैयाँ जरिबाना गरिएको थियो।
Discussion about this post