मोरङ : मोरङमा शनिबार छुट्टाछुट्टै स्थानमा दुई जना पुरुष मृत अवस्थामा फेला परेका छन्। उर्लाबारीमा धानखेतको जमेको पानीमा एक वृद्धको शव भेटिएको छ भने केराबारीमा फलैँचामा अर्का वृद्ध मृत अवस्थामा भेटिएका हुन्।
उर्लाबारी नगरपालिका–८ सिर्जना टोलस्थित सुरेश धिमालको धानखेतमा झापाको दमक नगरपालिका–१० का ६२ वर्षीय पञ्जावसिंह लिम्बुको शव फेला परेको प्रहरीले जनाएको छ। उनी खेतमा जमेको पानीमा उतानो परेको अवस्थामा भेटिएका थिए।
घटनाको जानकारी पाएपछि प्रहरी चौकी राजघाट र इलाका प्रहरी कार्यालय पथरीबाट टोली घटनास्थल पुगेको थियो। प्रहरीले आवश्यक कानुनी प्रक्रिया पूरा गरी शव पोस्टमार्टमका लागि मंगलबारेस्थित मदन भण्डारी अस्पताल तथा ट्रमा सेन्टर पठाएको छ।
त्यसैगरी, केराबारी गाउँपालिका–९ बेलचौरीस्थित एक फलैँचामा ७० वर्षीय घनबहादुर तामाङ मृत फेला परेका छन्। शनिबार बिहान उनी मृत अवस्थामा भेटिएको जानकारी पाएपछि अस्थायी प्रहरी पोस्ट भलुवा र इलाका प्रहरी कार्यालय बेलबारीबाट प्रहरी टोली घटनास्थल पुगेको थियो।
तामाङको शव आवश्यक कानुनी प्रक्रिया पूरा गरी पोस्टमार्टमका लागि बीपी कोइराला स्वास्थ्य विज्ञान प्रतिष्ठान धरान पठाइएको प्रहरीले जनाएको छ।
दुवै घटनामा मृत्युको कारण खुल्न बाँकी रहेको र घटनाबारे थप अनुसन्धान भइरहेको प्रहरीले जनाएको छ।
Discussion about this post