इटहरी — गत भदौ १० गते भोटेकोशी नदीमा आएको बाढी तथा डुबानबाट प्रभावित नागरिकको राहत र पुनःस्थापनाका लागि हिसान सुनसरीले सहयोग जुटाएको छ । उच्च शिक्षालय तथा माध्यमिक विद्यालय सङ्घ नेपाल (हिसान) सुनसरीको पहलमा विभिन्न विद्यालय तथा कलेजबाट ५६ लाख २८ हजार ६ सय ५२ रुपैयाँ सङ्कलन भएको हो ।
सङ्कलित रकम प्रधानमन्त्री दैवी प्रकोप उद्धार कोषमा जम्मा गरिने हिसान सुनसरीले जनाएको छ । इटहरी क्लस्टरबाट मात्रै ५२ लाख ९३ हजार ६ सय ४२ रुपैयाँ सङ्कलन भएको छ भने धरानबाट एक लाख ६० हजार १० रुपैयाँ र रामधुनी–इनरुवा क्षेत्रबाट एक लाख ७५ हजार रुपैयाँ जुटाइएको छ ।
विभिन्न विद्यालय, शिक्षक तथा विद्यार्थीको सहभागितामा सङ्कलित रकम विपद्बाट प्रभावित परिवारको राहत तथा पुनःस्थापनाका लागि प्रधानमन्त्री विपत् उद्धार तथा राहत कोषमा जम्मा गरिने सिहानले जनाएको छ । हिसान सुनसरीका अध्यक्ष सागर भट्टराईले विपद्को समयमा शैक्षिक क्षेत्रले सामाजिक उत्तरदायित्व निर्वाह गर्दै सहयोग गरेको बताएका छन् ।
कोशी सेन्ट जेम्सको साँढे पाँच लाख सहयोग :
सुनसरीको इटहरीस्थित कोशी सेन्ट जेम्सले प्रधानमन्त्री विपत् उद्धार तथा राहत कोषमा साँढे पाँच लाख जम्मा गर्ने घोषणा गरेको छ । हिसानमा नरहेको कोशी जेन्ट जेम्सका अध्यक्ष टङ्कबहादुर खुलालले कोशी सेन्ट जेम्सका शिक्षक, अभिभावक तथा विद्यार्थीबाट स्वस्फूर्त सहयोग रकम सङ्कलन गरिएको जनाएका छन् ।
भोटेकोशी बाढीपछि सरकारले विभिन्न चरणमा उद्धार तथा राहतको कामलाई तीव्र बनाएको छ भने हालसम्म प्रधानमन्त्री विपत् उद्धार तथा राहत कोषमा करीब छ अर्ब जम्मा भइसकेको सरकारले जनाएको छ । विभिन्न व्यक्ति, संस्था तथा विदेशी मित्र राष्ट्रहरूबाट सहयोग आउने क्रम जारी रहेको छ ।
Discussion about this post