उदयपुर : कोशी प्रदेशका मुख्यमन्त्री हिक्मतकुमार कार्कीले प्रदेश सरकारले नौ वर्षको अवधिमा भौतिक पूर्वाधार विकासलगायतका क्षेत्रमा उल्लेख्य उपलब्धि हासिल गरेको बताएका छन् ।
बुधबार उदयपुरको गाईघाटस्थित त्रियुगा नगरपालिका–६ जलजलेमा नवनिर्मित यातायात व्यवस्था सेवा कार्यालयको भवन उद्घाटन गर्दै उनले प्रदेश सरकारले सडक सञ्जाल, यातायात व्यवस्थापन, पुल तथा झोलुङ्गे पुल निर्माणमा उल्लेख्य काम गरेको बताएका हुन् ।
मुख्यमन्त्री कार्कीले नागरिकको जीवनसँग प्रत्यक्ष जोडिएका क्षेत्रमा प्रदेश सरकारले प्राथमिकताका साथ लगानी गरिरहेको बताए । संघीय तथा स्थानीय सरकारका कार्यालयको तुलनामा निकै कम खर्चमा प्रदेश सरकारका कार्यालय सञ्चालन भइरहेको उनको दाबी थियो ।
उनले संघीय सरकारले प्रदेशलाई आवश्यक सहयोग नगरेको भन्दै असन्तुष्टिसमेत व्यक्त गरे । प्रदेश सरकारलाई आवश्यक आर्थिक स्रोत, नीतिगत स्पष्टता र कानुनी आधार उपलब्ध नहुँदा विकास निर्माणका काममा बाधा पुगिरहेको उनको भनाइ थियो ।
‘प्रदेश सरकार राज्यको माइलो सरकार हो । तर, आफ्नै बलियो आर्थिक स्रोत छैन । संघीय सरकारले उपलब्ध गराउनुपर्ने आर्थिक तथा अन्य सहयोग नहुँदा प्रदेश सरकार हेपिएको महसुस भइरहेको छ,’ उनले भने ।
प्रदेश सरकारको सहयोगमा स्थानीयवासीले उपलब्ध गराएको दुई बिघा १० कठ्ठा जग्गामा यातायात व्यवस्था सेवा कार्यालयको भवन निर्माण गरिएको हो । करिब ७० लाख रुपैयाँ लागतमा निर्माण भएको भवनमा ट्रस्टसहित चारवटा संरचना र १२ कोठा रहेका छन् । भवन निर्माणको जिम्मा डाँगी निर्माण सेवाले पाएको थियो ।
कोशी प्रदेशको आन्तरिक मामिला तथा कानुन मन्त्रालयका सचिव कृष्णप्रसाद सापकोटाको अध्यक्षतामा भएको कार्यक्रममा उदयपुर क्षेत्र नम्बर १ का संघीय सांसद पारसमणि गेलाल, प्रदेश सरकारका आन्तरिक मामिला तथा कानुनमन्त्री गोम्बु शेर्पा, प्रदेशसभा उपसभामुख सिर्जना दनुवार, प्रदेशसभा सदस्यहरू हिमाल कार्की, गीता रेग्मी, नारायणबहादुर बुर्जामगर तथा त्रियुगा नगरपालिकाकी कार्यवाहक नगरप्रमुख महेश्वरी राईलगायतले शुभकामना मन्तव्य व्यक्त गरेका थिए ।
Discussion about this post