इटहरी : रानी–विराटनगर–इटहरी–धरान निर्माणाधीन ६ लेन सडकको काम तीव्र गतिमा भइरहेको छ । कतिपय ठाउँमा काम सकिएको छ भने धेरैजसो ठाउँमा निर्माणाधीन अवस्थामै छ ।
इटहरीको पानीपियादेखि आँपगाछी सम्मको करीब तीन किलोमिटर सडकको काम लगभग सकिएको छ । यतिबेला सडकको बीचमा सोलार बत्ती समेत जडान गरिएको छ भने बीचमा फूल समेत रोपिएको छ ।
अहिले यात्रुहरु सवारी रोकेरै कोही फोटो खिच्ने त कोही टिकटक बनाउन व्यस्त देखिन्छन् । आँखाको दृश्यमा आकर्षक देखिएकै कारण सामाजिक सञ्जालमा सडकका तस्वीर तथा भिडियोहरु प्रशस्तै देख्न पाइन्छन् ।
निर्माणाधीन ६ लेन सडक परियोजना आशिष निर्माण सेवाका इन्जिनियर सागर बडालका अनुसार २०७४ कात्तिकदेखि सुरु गरिएको काम करीब ९५ प्रतिशत सकिएको छ । उनका अनुसार उक्त निर्माण सेवाले इटहरीको पानीपियादेखि आँपगाछीसम्म दुई हजार सात सय मिटर (२.७) किलोमिटर सडक निर्माणको ठेक्का पाएको थियो ।
विराटनगरका केही क्षेत्र बाहेक इटहरीमा पहिलोपटक सोही निर्माण सेवाले मात्रै काम सक्न लागेको हो । अन्य ठेक्का पाएका कम्पनीले काम गरिरहेकोभएपनि पूर्ण रुपमा काम भएको छैन ।
‘हामीले ७७ वैशाखमै निर्माण सक्नेगरी काम गरेपनि कोभिड र बिजुलीको टावर नहटाइएका कारण ढिलो हुनपुग्यो,’ इन्जिनियर बडालले भने, ‘हामीले लगभग ९५ प्रतिशत काम सकेका छौँ, अब रोड मार्किङ गर्न बाँकी छ ।’
उनका अनुसार ८९ करोडको लागतमा पानीपियादेखि आँपगाछीसम्मको ६ लेन सडक निर्माणको काम गरिएको होे । सडकमा सोलार बत्ती समेत जडान गरिएको छ ।
५३ वटा जडान गरिएको सोलार बत्ती रातभर बल्ने उनले बताए । ‘सोलार बत्ती पनि जडान गरिसकिएको छ, त्यस्तै सडकको बीचमा घाँस बिछ्याउने काम पनि गरिसकेका छौँ,’ बडालले टाकुरासँग भने, ‘सडकको दायाँबायाँ गरी ८२ फुटमा काम गरेका हौँ ।’
उनका अनुसार कतिपय ठाउँमा अहिले स्थानीयले फूलका बिरुवा रोप्ने तथा विभिन्न प्रजातिका रुखका बिरुवा समेत रोपेका छन् ।
‘हामीलाई आयोजनाले बिरुवा नै रोप्नु नभनेका कारण नरोपिएको हो, तर स्थानीयले धेरैजसो ठाउँमा बिरुवा रोपेका कारण दृश्यमा पनि सुन्दर देखिन थालेको छ,’ उनले भने, ‘गाडी कुद्ने बाहेकको डेढ मिटरको ड्रेन छ, यो चैँ फुटपाथका रुपमा प्रयोग गरिनेछ ।’
उनका अनुसार फुटपाथमा पार्किङ गर्न पाइदैंन । पार्किङ प्रयोजनकै लागि भने उपयोग गर्न नपाइने उनको तर्क छ ।
रानी–विराटनगर–इटहरी–धरान निर्माणाधीन ६ लेन सडक राष्ट्रिय गौरवको आयोजना हो । हाल विभिन्न १७ ठाउँमा धमाधम काम भइरहेको सडक आयोजनाका इन्जिनियर उपेन्द्र दासले बताए ।
‘सोचेअनुसारको ठेक्कापट्टा नलाग्दा धेरै ठाउँमा समयमै सम्पन्न हुन सकेको छैन, केही ठाउँमा ढिलोगरी काम सुरु भयो’ दासले भने, ‘धरानको तीनकुनेसम्ममा हामीले ७९।८० सालभित्रममा सक्ने लक्ष्य राखेर काम अघि सारेका छौँ ।’
उनका अनुसार विराटनगरको रानीदेखि धरानको तीनकुनेसम्म अहिले ४४ किलोमिटर सडकको काम भइरहेको छ ।
Discussion about this post