इटहरीका संक्रमित निको भएर घर फर्कँदा समाजले बस्न दिएन

इटहरीका एक कोरोना संक्रमित सफल उपचारपछि निको भएर घर फर्कँदा समाजले गाउँमा बस्न नदिएको पाईएको छ ।

इटहरी ५ का २७ बर्षीय कोरोना संक्रमित पुरुष धरानस्थित वीपी कोइराला स्वास्थ विज्ञान प्रतिष्ठानमा सफल उपचार गरेर घर फर्किएपनि उनलाई गाउँ, समाजले बस्न नदिएको पीडितले गुनासो गरेका छन् ।

“एक साता हस्पिटल बसेर निको भएपछि घर आउँन लाग्दा समाजले बहिष्कार गर्यो,” पीडित युवकले टाकुरासँग भने, “एक सातापछि पुन: परीक्षण गर्दा नेगेटिभ रिपोर्ट आयो, खुशीले अब त घर जान पाइयो भनेर आएँ, तर समाजले बस्न दिएन ।”

घर नजिकै रहेको आफ्ना ठूलोबुवाको खाली रहेको घरमा अरु १५ दिन आफू सुरक्षीत बस्ने सहमति भएको भएपनि गाउँ घरका अन्य स्थानीयले भने आँफूहरुलाई रोग लागे को जिम्मेवारी हुने भन्दै घृणित नजरले अपशब्द बोलेको उनको गुनासो छ ।

गत श्रावण २० गते धरानस्थित वीपी कोइराला स्वास्थ विज्ञान प्रतिष्ठानमा उनले स्वाब दिएका थिए । २२ गते विहान ११ बजे उनीमा कोरोना भाइरस संक्रमणको पुष्टि भएको थियो । इटहरी प्रशासनको लापरबाही र अस्पतालमा बेड अभावका कारण उनी ३२ घन्टा सम्म घरमै बसे ।

टाकुराले यस बिषयमा निरन्तर खबरदारी गरेपछि रिपोर्ट आएको ३२ घन्टापछि उनलाई वीपी प्रतिष्ठानमा उपचारका लागि लगिएको थियो ।

एक साताको उपचारपछि शुक्रवार साँझ घर फर्कन लाग्दा समाजले बस्न नदिएपछि उनी इटहरीको एक होटलमा बस्दै आएका छन् ।

प्रहरी प्रशासन र स्थानीय जनप्रतिनिधिले गाउँलेलाई सम्झाउँदा पनि स्थानीय मानिस नमानेपछि उनी अहिले होटलमा बस्न बाध्य भएको पीडित युवकले बताए ।

उनले टाकुरासँग भने, “घरमा तालाबन्दी गर्ने, हामीलाई रोग लागे को जिम्मेवारी हुने भन्दै छिमेकीले बहिष्कार गरे ।”

उनले आँफूले इटहरीका अन्य जनप्रतिनिधिलाई यस सम्बन्धमा जानकारी गराउँन सम्पर्क गरेपनि फोन नउठाउने गरेको गुनासो समेत गरे ।

“मैले इटहरीका मेयर द्वारिकलाल चौधरी र उपमेयर लक्ष्मी गौतमलाई जानकारी गराउँन खोज्दा फोन उठेन,” उनले भने, “यसअघि पनि उहाँहरुको फोन कहिल्यै उठ्दैन, स्थानीय वडाध्यक्ष पनि पन्छिने काम गरेका छन् ।

यस बिषयमा इटहरी उपमहानगरपालिकाका मेयर द्वारिकलाल चौधरीलाई बुझ्न फोन सम्पर्क गरेपनि उनको फोन उठेन