मिजासिलो स्वभावका सुन्दरको अस्पताल घुमाउँदा–घुमाउँदै मृत्यु

इटहरी : भोजपुरका सुन्दर श्रेष्ठलाई भाद्र १ गते ज्वरो आएको संकेत देखियो । २ गते भोजपुरको घोरेटार स्वास्थ्य केन्द्रमा परीक्षण गराउँदा जन्डिस भएको रिपोर्ट आयो ।

त्यहाँबाट अलिक सुविधा सम्पन्न अस्पतालमा लैजानका लागि स्वास्थ्यकर्मीको सुझाव अनुसार परिवारजनले भोजपुर जिल्ला अस्पताल लगे ।

तर, भोजपुर अस्पतालले सुनसरीको धरानस्थित वीपी कोईराला स्वास्थ्य विज्ञान प्रतिष्ठानमा उपचारका लागि लैजान सुझाव दिएपछि परिवारजनमा पीर बढ्यो । पीर सँगै बिरामी निको हुनेमा विश्वास पनि थियो । भाद्र ४ गते साँझ धरानस्थित वीपी प्रतिष्ठानमा ल्याएर बिरामीको उपचार गर्न सुरु गरियो ।

तर, राती १० बजे डाक्टरले आइसियु खाली नभएको र बिरामीलाई अन्यत्र नै रिफर गर्नुपर्ने सुनाएपछि परिवारजन झस्किए ।

परिवारजनले टाकुरालाई दिएको जानकारी अनुसार वीपी प्रतिष्ठानमा भनसुन भएमात्र आइसियु खाली हुने बताएसँगै परिवारजनमा झनै तनाव बढ्यो ।

विराटनगरका सबैजसो अस्पतालमा फोन सम्पर्क गरिएपनि सबै अस्पतालले आइसियु खाली नभएको जानकारी गराएपछि कोशी अस्पताल विराटनगरमा कार्यरत एकजना नर्सको समन्वयमा विराटनगरको महेन्द्रचौकमा रहेको म्याक्स इन्टरनेशनल हस्पिटल एण्ड ट्रमा सेन्टरमा आइसियु खाली रहेको बुझिएपछि उपचारका लागि लगियो ।

राती साढे १२ बजे वीपी प्रतिष्ठानबाट एम्बुलेन्समा राखेर म्याक्स हस्पिटल लगिएपनि जटिल बिरामीलाई भर्ना गर्न नमिल्ने भन्दै फकाईदिएको परिवारजनले गुनासो गरेका छन् ।

विराटनगरको कोशी, न्यूरो लगायतका अस्पतालमा पुर्याईएपनि ती अस्पतालले पनि भर्ना गर्न नमानेपछि राती १ः३० बजे, ग्रिन क्रसमा भेन्टिलेटर खाली भएको बुझिएपछि उक्त अस्पताल लगियो । तर, त्यहाँ पनि जटिल बिरामीलाई भर्ना नलिने भन्दै अस्पतालले फकाईदियो ।

भर्ना गर्नका लागि बारम्बार अपिल गरिएपनि आँफूहरुले भर्ना गर्न नमिल्ने भन्दै अस्पताल प्रशासनले बताएपछि सोही राती बिरामीको मृत्यु भयो ।

श्रेष्ठ भोजपुरको घोरेटारमा हार्डवेयर पसल गर्दै आएका थिए । अचानक ज्वरो आएर स्वास्थ्य जाँच गर्दा जण्डिस देखिएपछि उपचारका लागि विभिन्न अस्पताल घुमाउँदा–घुमाउँदै मृत्यु भएपछि अहिले परिवारजन विक्षिप्त बनेका छन् ।

अहिले कोभिड १९ का कारण अस्पतालले बिरामी भर्ना गर्न नमान्नु र बिरामीको उपचार गर्न नमान्दा अकालमै ज्यान जाने गरेका उदाहरण प्रसस्त छन् ।

पीडित परिवारले टाकुरासँग भने, ‘धरानको वीपी प्रतिष्ठानले त अत्यन्तै घृणित र अमानवीय व्यवहार गर्यो, कोही पनि मानिस रहरले अस्पताल गएको हुँदैन ।’

मिजासिलो स्वभावका श्रेष्ठ ४४ बर्षीय रहेको परिवारजनले बताएका छन् । उनका तीन छोरीहरु रहेका छन् ।