ईलाम : ईलाम पर्यटकहरुका लागि प्रख्यात ठाउँ हो ।
घुम्न आउनेहरू यहाँको प्राकृतिक वातावरणले मोहित हुन्छन् । तर, पछिल्लो समय लकडाउनका कारण ईलाममा पर्यटकको अवस्था ठप्प छ ।
स्थानीय तथा बाह्य पर्यटकहरुको आवागमन नभएपनि ईलामको हर्कटेमा रहेको ओशो डिभाइन सेन्टर (ध्यान केन्द्र) मा अहिले युवाहरूको आकर्षण बढ्दो छ ।
ओशो डिभाइन सेन्टरका सन्चालक तथा ध्यान गुरु केवल उप्रेती (स्वामी विकास) भन्छन्, “तपाईंसँग तपाईं रहने कला नै ध्यान हो, आफ्नै स्वभावमा रहने कला तपाईंले सिक्न आवश्यक छ ।”
उनले पछिल्लो समय मानिसहरू तनावमा गुज्रिरहेकाले तनावरहित हुनका लागि ध्यान बाहेक अरु केही बिकल्प नरहेको उनी बताउँछन् ।
“तपाईं जहाँ आनन्दित हुनुहुन्छ, त्यही नै जिन्दगी हो,” उनले टाकुरासँग भने, “आफ्नो अस्तित्वसँग जोडिने कला सिक्नुपर्ने आवश्यक छ, त्यसका लागि अध्यात्मदेखि बाहेक केही विकल्प छैन ।”
करीब ६ बर्ष अगाडि स्थापना भएको ध्यान केन्द्रमा आएर ध्यान गर्ने मानिसको स्वभाव परिवर्तन हुने उनको तर्क छ ।
“तनावको युगमा यहाँ आउँदा आफैंलाई भेट्टाइछ, हाँस्दै, खेल्दै, नाच्दै आफ्नो जीवन चिन्न सकिन्छ । ध्यान भनेको आँखा चिम्लिने मात्र होइन ।” उनले सुनाए ।
उनले यहाँ आएर जानेहरुले आफ्नो जीवनमा सकारात्मक परिवर्तन गर्ने बताए ।
“छोड्नु समस्याको समाधान होइन, म्यानेज गर्नु चैँ समाधान हो” उनले भने, “सबै चिज हामीलाई चाहिन्छ, हामीलाई चाहिने मुख्य कुरा खुशी हो ।”
ध्यानको आश्रममा आउनेहरूले समाज भन्दा भिन्न माहोल महसुस गर्ने उनले बताए ।
“हमेसा आनन्दित हुने मानिसलाई धनी गरिबको मत्लब हुँदैन,” उनले भने, “तर ध्यान नगर्ने र स्थिर नरहने मानिसलाई पैसा भएपनि, नभपनि तनाव नै भइरहन्छ ।”
१२ बर्षको उमेरमै सन्यास लिएकि जेसीका उप्रेती भन्छिन्, “ओशो डिभाइन सेन्टरमा आउनेहरू केही भिन्न भएर जान्छन् ।” यहाँ जात, धर्म, लिङ्गको कुरा नहुने र पारिवारिक वातावरणमा बसाई रहने उनले सुनाइन् ।
“समाजले हामीलाई जतिबेलै जजमेन्ट गरिरहेको हुन्छ, यहाँ भने खुलेर रुन, हाँस्न पाइन्छ,” उनले टाकुरासँग भनिन्, “आफ्नो दु:ख खुलेर पोख्ने ठाउँ पनि हो यो । मेडिटेसन सेन्टर भनेको तनाव भएपछि आउने हो भन्ने बुझाइ छ । तर, तनावमा मात्र आउनुभन्दा पनि खुसीमा पनि आउने ठाउँ हो यो ।”
Discussion about this post