धरान : धरान उपमहानगरपालिकाले भुमिहीन दलित, भुमिहीन सुकुम्बासी तथा अव्यवस्थित बसोबासीहरुलाई पूर्जा वितरणका लागि भोली (आइतबार) देखि फारम वितरण तथा लगत संकलन कार्य शुरु गर्ने भएको छ ।
धरान उपमहानगरपालिकाका प्रमुख तिलक राईको संयोजत्वमा भूमिहीन दलित, भूमिहीन सुकुम्बासी तथा अव्यवस्थित बसोबासीको पहिचान, लगत संकलन प्रमाणीकरण गर्ने उद्देश्यले गठित भूमि सम्बन्धी समस्या समाधान स्थानीय सहजिकरणको आज बसेको दोस्रो बैठकले भोलीदेखि फारम वितरण गरिने जानकारी गराएको हो ।
धरान वडा नं. १५ बाट फारम वितरण गर्न सुरु गरिने धरान उपमहानगरपालिकाले जनाएको छ । लगत संलकन इकाईका संयोजक वेद सापकोटाका अनुसार आइतबारदेखि धरानको २० वटै वडा कार्यालय मार्फत फारम वितरण र फारम भराउने कार्य सुरु गरिने छ ।
लगत संकलनका लागि ३६ जना कर्मचारी तयारी अवस्थामा रहेको उनले जानकारी दिए । भुमि आयोगमार्फत हाल धरानमा लगत संकलनको लागि १४ हजार ५ सय फारम आइपुगेको छ । लगत संकलन भएपछि कम्प्युटरमा इन्ट्री गरिने र त्यसपछि जग्गाको नापजाँच लगायत कार्य शुरु हुने सापकोटाले बताए ।
सरकारले भुहिमिन दलित, भुमिहीन सुकुम्बासी तथा अव्यवस्थित बसोबास भएकाहरुलाई पूर्जा उपलब्ध गराउन प्रक्रिया अघि बढाएको छ ।
Discussion about this post