इटहरी : इटहरीमा निजी तथा सामाजिक क्षेत्रको अगुवाइमा सञ्चालनमा आएको अक्सिजन सहितको ८० शैयाको आइसोलेसनका लागि दाताहरुबाट स्वतस्फूर्त सहयोग जुट्न थालेको छ ।
इटहरी १० स्थित पिपुल्स मल्टिपल हेल्थ इन्सिच्युटको भवनमा सञ्चालित आइलेसनन सेन्टरका लागि विभिन्न ब्यक्ति तथा संघ संस्थाबाट नगदसहित जिन्सी तथा खाद्यान्न सहयोग जुटेको उद्योग वाणिज्य संघ इटहरीका अध्यक्ष भीम पौडेलले जानकारी दिए ।
आइसोलेसन सेन्टरका लागि नेपाल युवा उद्यमी मञ्च सुनसरीले नगद ३ लाख १ हजार रुपैँया सहयोग गरेको छ । यस्तै, इटहरी बितरक संघले नगद १ लाख ५१ हजार रुपैँया सहयोग गरेको छ । यस्तै, इटहरी जेसिजको तर्फबाट १ लाख २७ हजार नगद सहयोग उपलब्ध भएको छ । कस्मेटिक मनिहारी संघ इटहरीको तर्फबाट नगद १ लाख २१ हजार र सुनचांदी व्यवसायी संघको तर्फबाट नगद १ लाख १ हजार सहयोग प्राप्तभएको पौडेलले बताए ।
यस्तै, होटल व्यवसायी संघ इटहरीको तर्फबाट १ लाख ११ हजार र मदिरा व्यावसायी संघ इटहरीको तर्फबाट १ लाख १ हजार नगद सहयोग प्राप्त भएको पौडेलले जानकारी दिए ।
आइसोलेसनका लागि विभिन्न सहकारी तथा व्यवसायिक संस्थाहरुबाट नगद बाहेकका अन्य विभिन्न सहयोग समेत प्राप्त भएको मारवाडी सेवा समिति इटहरीका उपाध्यक्ष मुकेश अग्रवालले जानकारी दिए । अग्रवालका अनुसार इटहरी २० मा रहेको कामधेनु दूग्ध विकास सहकारी संस्थाले आइसोलेसनलाई तीन महिनाका लागि र इटहरीमै रहेको तमोर डेरी उद्योगले एक महिनाका लागि दूध तथा दूग्धजन्य पदार्थ निःशुल्क प्रदान गर्ने भएको छ ।
यस्तै, झापामा रहेको हिमालयन लस उद्योगबाट उत्पादित २६ हजार बराबरको सुपारीको पातबाट बनेका विभिन्न प्रकारका प्याकेजिङका सामान सहयोग भएको छ । ब्यक्तिगत रुपमा पनि नगद सहयोग प्राप्त भएको छ ।
उद्योग वाणिज्य संघ इटहरीको संयोजन तथा नेपाल प्रेस युनियन सुनसरी, युवा उद्यमी मञ्च सुनसरी, श्रीकृष्ण प्रणामी मन्दिर, इटहरी जेसीज र मारवाडी सेवा समिति इटहरीको सहकार्यमा आइसोलसन संचालन भएको हो ।
Discussion about this post