सुनसरीमा विपद् व्यवस्थापनका लागि तयार रहन निर्देशन, गोताखोरसहित सुरक्षा निकाय तयारी अवस्थामा
जिल्ला प्रशासन कार्यालय सुनसरीले विपद् व्यवस्थापनका लागि तयारी अवस्थामा रहन जिल्ला भित्रका सबै १२ ओटा स्थानीय तहलाई निर्देशन दिएको छ ।
हरेक स्थानीय तहले एक थान रबर बोट, ५० थान लाइफ ज्याकेट, चारदेखि पाँच रोल मेन डोरी, १० थान क्यारोबेना हुक, चार थान स्ट्रेचर र पाँच थान रेस्क्यु ट्युब तयारी अवस्थामा राख्नुपर्ने निर्णय गरिएको प्रमुख जिल्ला अधिकारी उमेशकुमार ढकालले बताए ।
उनका अनुसार नेपाल प्रहरी, सशस्त्र प्रहरी बल र नेपाली सेनाले गोताखोर सहितको राहत तथा उद्धार टोली तयारी अवस्थामा राख्नुपर्नेछ । यसैगरी, राहत तथा उद्धारमा सक्रिय गैर सरकारी सँस्थालाई पनि तयारी अवस्थामा रहन प्रशासनले आग्रह गरेको छ ।
प्रशासनका अनुसार प्रत्येक स्थानीय तहले कम्तिमा दुई ओटा आश्रयस्थलको व्यवस्था गरी उद्धार गरिएका व्यक्तिको तत्कालीन बासको प्रबन्ध गर्नुपर्नेछ । औषधी तथा चिकित्सकको व्यवस्था स्वास्थ्य कार्यालयले गर्नेछ ।
कटान नियन्त्रणका लागि तत्काल एक हजार थान तार जाली र २० हजार थान बोराको प्रबन्ध सिँचाइ डिभिजन कार्यालयले गर्नेछ ।
यसैगरी, जिल्ला आपतकालिन कार्य सञ्चालन केन्द्रलाई २४ घण्टा सक्रिय बनाइने जिल्ला प्रशासन कार्यालय सुनसरीले जनाएको छ ।
Discussion about this post