सुनसरी : सुनसरीको बर्जु गाउँपालिका ६ मा आयोजित बर्जु महोत्सवमा कलाकार नआएपछि आक्रोशित स्थानीयले स्टेज र गाडीमै आगजनी गरे ।
प्रशासनको निर्देशनको अवज्ञा गर्दै आयोजना गरिएको महोत्सवको अन्तिम दिन आज (मंगलबार) चर्चित भोजपुरी कलाकार खेसरीलाल यादव आउने कार्यक्रम थियो । तर, प्रशासनले उनलाई विराटनगरबाटै आउन रोक लगाएपछि कार्यक्रममा आएका स्थानीयले आक्रोशित भएर चारवटा स्कारपियो र स्टेजमा आगजनी गरेका छन् ।
बर्जु गाउँपालिकास्थित चिमडीमा २३ गतेदेखि माघ ४ गतेसम्म जिल्ला प्रशासन कार्यालयबाट महोत्सव आयोजना गर्न आयोजकले अनुमति लिएकोमा उक्त महोत्सवमा भीडभाड बढेको पाइएपछि रोक्न आइतबार नै पत्राचार गरिएपनि मंगलबार (आज) अन्तिम दिन रहेको भन्दै भीडभाडसहित महोत्सव आयोजना गरिएको थियो ।
तर मेला स्थलमा ठुलो भीड जम्मा भएपछि प्रशासनले कलाकार खेसरीलाललाई बाटोमै रोकेको थियो । विराटनगरको होटल एसियाटिकमा बसेका उनलाई स्थानीय प्रशासनले कार्यक्रमस्थलमा जान दिएको थिएन ।
स्कारपियोमा आगजनीसहित स्टेज तोडफोड गरेको समूहले लाखौँ मल्य बराबरको साउन्ड सिस्टम र लाइट तोडफोड गरेको छ । साउन्डसिस्टम एसएम साउन्डको रहेको थियो ।
सुनसरीका प्रमुख जिल्ला अधिकारी ईन्द्रदेव यादवका अनुसार दिउँसोको करीब साढे ३ बजेदेखि उपस्थितहरूले स्टेजमा आगजनी गरेका थिए । उनका अनुसार करीब एक हजारको संख्यामा उपस्थित स्थानीयले तत्काल नम्बर नखुलेको चारवटा स्कारपियो, एउटा सिटीसफारी, एउटा मोटरसाइकल र एउटा साइकलमा आगजनी गरेका थिए ।
यस्तै, आक्रोशित स्थानीयले इलाका प्रहरी कार्यालय दुहबीको बा १ झ १४१२ नम्बरको गाडीको अगाडिमा सिसामा ढुंगा प्रहार समेत गरेका थिए ।
बर्जु गाउँपालिका ६ का वडाध्यक्ष विनोदकुमार चौधरीका अनुसार गृह मन्त्रालयले २५ जनाभन्दा बढी जम्मा हुन नदिएपछि स्थानीय प्रशासनले महोत्सव स्थगित गर्न निर्देशन दिएको थियो ।
तर आयोजक बर्जु सामुदायिक विकास केन्द्र सुनसरीले महोत्सव रोक्न नमान्दा उक्त घटना भएको बताइएको छ । तोडफोड र आगजनीपछि बर्जु क्षेत्रको अवस्था तनावग्रस्त बनेको थियो ।
प्रजिअ यादवका अनुसार साँझ ६ बजे मात्रै सबै भीड तीतरबितर बनेको थियो ।
यो पनि – सुनसरीको बर्जुमा कलाकार नआएपछि स्टेजमा आगजनी, चारवटा स्कारपियो जलाइयो
Discussion about this post