इटहरी (डेस्क) : सुनसरीको बराहक्षेत्र नगरपालिका वडा नं १ स्थित बाघ खोलाले अटो (टेम्पो) बगाउँदा एक किशोरीको मृत्यु भएको छ ।
पूर्व क्षेत्रीय ट्राफिक प्रहरी कार्यालय इटहरीका अुनसार मृत्यु हुनेमा बराहक्षेत्र १ चतरा बस्ने कल्पना राईकी १७ वर्षीया छोरी किस्टिफिना राई रहेकी छन् ।
आइतबार राति ७ः४५ बजेतिर बराहक्षेत्रबाट धरानतर्फ जाँदै गरेको को २ ह ८९८५ नम्बरको टेम्पोे खोला तर्ने क्रममा बगाएको थियो ।
टेम्पो र चालक खोलाले बगाएर बेपत्ता भएको खबर आएपछि इलाका प्रहरी कार्यालय महेन्द्रनगरबाट खटिएको प्रहरी टोली र सशस्त्र वेश क्याम्प चतराबाट खटिएको प्रहरी टोलीले टेम्पो बगाएको स्थानभन्दा ६ सय मिटर तल राईको शव फेला पारेको प्रहरीले जनाएको छ ।
प्रहरीका अनुसार टेम्पोमा सवार जिल्ला रसुवा गोसाइकुण्ड गाउँपालिका ६ धुन्चे बस्ने वर्ष १८ कि आनियाँ तामाङ घाइते भएकी छन् । टेम्पो चालक जिल्ला सुनसरीको धरान १७ बस्ने वर्ष २२ को राजु राईलाई प्रहरीले नियन्त्रणमा लिएको छ ।
मृतक राईको शव पोस्टमार्टमका लागि धरानस्थित वीपी कोइराला स्वास्थ्य विज्ञान प्रतिष्ठान लगिएको प्रहरीले जनाएको छ ।
वर्षातका कारण खोलामा पानी बढेकाले टेम्पो दुर्घटना भएको प्रारम्भिक अनुसन्धानबाट खुलेको छ ।
घटनाबारे थप अनुसन्धान सुरु गरिएको प्रहरीले जनाएको छ ।
Discussion about this post