इटहरी : उदयपुरको बेलका नगरपालिका ७ मा एउटै परिवारका तीनजनाको हत्या गरेको आरोपमा पक्राउ परेका व्यक्तिलाई प्रहरीले सार्वजनिक गरेको छ ।
१ नम्बर प्रदेश प्रहरी कार्यालय विराटनगरका प्रवक्ता, प्रहरी उपरीक्षक (एसपी) नवीनराज राईका अुनसार पक्राउ पर्नेमा स्थानीय ४३ वर्षीय नरबहादुर बस्नेत छन् ।
आइतबार पत्रकार सम्मेलन गरी पक्राउ परेका बस्नेतलाई सार्वजनिक गरिएको हो ।
गत शुक्रबार बिहान गोवाटारस्थित वाबिङ खोलामा स्थानीय ३७ वर्षीय राजकुमार बस्नेत, उनकी ३३ वर्षीया श्रीमती सरिता बस्नेत र १२ वर्षीय छोरा सुजन बस्नेतको धारिलो हतियार प्रहार गरी हत्या भएको थियो ।
जिल्ला प्रहरी कार्यालय उदयपुरका प्रहरी उपरीक्षकसहित खटिएको टोलीले अनुसन्धानका क्रममा बस्नेतलाई नियन्त्रणमा लिएको थियो । पक्राउ परेका उनको साथबाट प्रहरीले हत्यामा प्रयोग गरिएको खुकुरी पनि बरामद गरेको एसपी राईले जानकारी दिए ।
पक्राउ परेका बस्नेतलाई जिल्ला अदालत उदयपुरबाट म्याद थप गरी ज्यान सम्बन्धी कसुरमा थप अनुसन्धान भइरहेको प्रदेश प्रहरी कार्यालय विराटनगरले जनाएको छ ।
Discussion about this post