मोरङ : मोरङको सुनवर्षी नगरपालिकामा धामी बस्न हिँडेका एक युवक मृत भेटिएका छन् । सुनवर्षी ४ का ३२ वर्षीय अशोककुमार यादव मृत भेटिएका हुन् ।
बिहीबार साँझ उनी घरबाट धामी बस्नका लागि लरीकट्टा भन्ने ठाउँमा जान्छु भन्दै हिँडेका थिए । शुक्रबार बिहान घरबाट करिब डेढ किलोमिटर टाढा सडकमा उनको शव फेला परेको हो ।
प्रहरीका अनुसार मृतकको पेटमा ठूलो चोट छ । स्थानीयले भने पेटमा छुरा प्रहार गरी हत्या भएको दाबी गरेका छन् ।
जिल्ला प्रहरी कार्यालय मोरङका डीएसपी दीपक श्रेष्ठले घटना शंकास्पद भएकाले तालिम प्राप्त कुकुरसहितको प्रहरी टोली परिचालन गरेर अनुसन्धान अगाडि बढाएको बताए ।
डीएसपी श्रेष्ठका अनुसार बिहीबार उनी प्रदेश १–०२–०४४ प ३२६१ नम्बरको मोटरसाइकलमा घरबाट निस्किएका उनी शुक्रबार बिहान घरबाट पूर्वतर्फको भित्री सडक खण्डमा राखिएको अवस्थामा मोटरसाइकल भेटिएको थियो ।
मोटरसाइकल भएको स्थानबाट करिब १० मिटर दक्षिण सडकमा उनको शव फेला परेको थियो । घटना शंकास्पद देखिएकाले सूक्ष्म रुपमा अनुसन्धान सुरु गरिएको प्रहरीले जनाएको छ ।
Discussion about this post