इटहरी : लोकतान्त्रिक–बाम गठबन्धनको तर्फबाट सुनसरी क्षेत्र नं. २ (क) बाट प्रदेशसभा सदस्यको उम्मेदवार रहेका द्वारिकलाल चौधरीले प्रदेश १ का पूर्व मुख्यमन्त्री शेरधन राईप्रति कटाक्ष गरेका छन् ।
मंगलबार इटहरी २० तरहरामा आयोजित लोकतान्त्रिक–बाम गठबन्धनको भेलामा सम्बोधन गर्दै चौधरीले राईप्रति कटाक्ष गरेका हुन् ।
प्रदेश १ सरकारको मुख्यमन्त्री हुँदा नामकरण समेत गर्न नसकेको आरोप लगाउँदै चौधरीले अब लोकतान्त्रिक–बाम गठबन्धनले बहुमत ल्याएर प्रदेश सरकार निर्माण गरी नामकरण गर्ने बताए ।
‘हामीले देख्यौँ तीनै गफ गर्ने केपी ओलीका अनुयायी शेरधन राई । वहाँले चारवर्षसम्म मुख्यमन्त्रीको हैसियतमा काम गर्नुभो, तर वहाँले प्रदेशको नामकरण पनि गर्न सक्नुभएन,’ चौधरीले सम्बोधनका क्रममा भने, ‘उहाँलाई विवाह अगाडि एकजना महिला पन्छाउँदै ठिक्क भयो, विवाह भइसकेपछि मेडमलाई हेलिकोप्टरमा उडाउँदै ठिक्क भयो । के को प्रदेशको नामकरण हुन्छ, के को विकास हुन्छ ।’
उनले एमाले नेतृत्वको सरकार रहँदा विकास निर्माणका योजना अलपत्र परेको बताए । अलपत्र परेका विकासका योजना र नामकरण साझा सहमतिमा टुंगो लगाउने बताउँदै उनले प्रदेश १ लाई मुलुकको उत्कृष्ट प्रदेशका रूपमा निर्माण गर्ने तर्क गरे ।
समृद्व प्रदेश निर्माणका लागि लोकतान्त्रिक–बाम गठबन्धनलाई जिताउन उनको अपिल थियो ।
मुलुकको रक्षाका लागि बनेको लोकतान्त्रिक–बाम गठबन्धनका विरुद्व नेकपा एमालेका अध्यक्ष केपी ओलीले जसपा र राप्रपासहितको गठबन्धन गर्नुको औचित्य नरहेको समेत उनले बताए ।
चौधरीले ओलीप्रति लक्षित गर्दै भने, ‘ओलीजी एक डुब्न लागेका मनुवा हुन्, जब कोही तलाउमा डुब्न लाग्छन्, उसलाई त्यान्द्रोको पनि सहारा चाहिन्छ, ओलीजी त्यान्द्रो समातेर हामीसँग प्रतिष्पर्धामा आउँछन् ।’
मंसिर ४ पछिको निर्वाचनमा नेकपा एमाले तलाउमा डुब्ने उनको अभिव्यक्ति थियो । ‘नेकपा एमालेलाई अब कुनै शक्तिले बचाउन सक्दैन,’ उनले भने, ‘हाम्रो विजयी अभियानलाई कुनै तागतले रोक्न सक्दैन ।’
इटहरी उपमहानगरपालिकाका निवर्तमान मेयर समेत रहेका चौधरी नेकपा एमाले परित्याग गरी अघिल्लो महिना माओबादी केन्द्र प्रवेश गरेका हुन् । उनी माओबादी प्रवेश गरेसँगै सत्ता गठबन्धनको तर्फबाट सुनसरी २ (क) बाट प्रदेशसभा सदस्यको उम्मेदवार छन् ।
यस्तै, सुनसरी क्षेत्र नं. २ बाट प्रतिनिधिसभा सदस्यमा नेपाली कांग्रेसका सीताराम मेहता चुनावी प्रतिष्पर्धामा छन् ।
उता, नेकपा एमालेबाट भने प्रतिनिधिसभा सदस्यमा भीम आचार्य प्रतिष्पर्धामा छन् भने प्रदेशसभामा रेवती भण्डारी चुनावी प्रतिष्पर्धामा होमिएका छन् ।
भिडियो
Discussion about this post