विराटनगर : विराटनगरलाई सफा, सुन्दर, उज्यालो, व्यवस्थित र विकसित बनाउने अभियानमा लागेको महानगरले ध्वनि नियन्त्रणको तयारी सुरु गरेको छ ।
मंगलबार विराटनगरस्थित धार्मिक र नागरिक समाजका अगुवाहरूलाई बोलाएर कसरी ध्वनि प्रदूषण नियन्त्रण गर्ने भन्ने विषयमा सुझाव मागेको छ ।
अन्तरक्रियामा सहभागीहरूले महानगरले सुरु गरेको अभियानमा साथ दिने प्रतिबद्वता जनाएका छन् । उनीहरूले डिजेका कारण मुटुका रोगी, ज्येष्ठ नागरिक, विद्यार्थी र बालबालिकालाई बढी असर परेकाले नियन्त्रण गर्नुपर्नेमा जोड दिएका थिए ।
छोयलिङ बौद्ध गुम्बा रानीका कोषाध्यक्ष अनुपकुमार स्याङ्बोले पछिल्लो समय महानगरपालिकाले जनआकांक्षाअनुसारका कार्य गरेको भन्दै प्रशंसा गरे । उनले ध्वनि प्रदूषण नियन्त्रण अति नै आवश्यक रहेको बताए ।
इसाई समाज विराटनगरका अध्यक्ष सुरज मल्लले धार्मिक कार्यक्रम गर्दा अरुलाई असर नपर्ने गरी गर्नुपर्नेमा जोड दिए । उनले इसाई समाजले बाहिर कसैले थाहै नपाउने गरी हलभित्र धार्मि कार्यक्रम गर्ने गरेको सुनाए ।
अन्तरक्रियामा महानगरका मेयर नागेश कोइरालाले विराटनगरलाई सुव्यवस्थित, संस्कारयुक्त र अनुशासित सहर बनाउने अभियानअन्तर्गत ध्वनि प्रदूषण कसरी नियन्त्रण गर्न सकिन्छ भन्ने विषयमा गहन छलफल भएको बताए ।
उनले मुटुरोगीलाई ध्वनि प्रदूषणले सबैभन्दा बढी समस्यामा पारेको सुनाए । मेयर कोइरालाले एउटै छलफलबाट निष्कर्षमा पुग्नुभन्दा फेरि अर्को छलफल गरेर सबैको राय लिएर निष्कर्षमा पुग्ने बताए ।
महानगरका प्रमुख प्रशासकीय अधिकृत विष्णुप्रसाद कोइरालाले प्रकाश पारेका थिए । उनले सडकमै विवाह र धार्मिक कार्यक्रम गर्दा आवतजावतमा समस्या हुने गरेको बताए ।
धार्मिक कार्यक्रममा चारैतर्फ फर्काएर माइक बजाउँदा वरपर बसोबास गर्नेलाई समस्या भएको उल्लेख गरे ।
Discussion about this post