विराटनगर : कोसी नाम खारेज गर्दै पहिचानका आधारमा प्रदेशको नाम राखिनुपर्ने मागसहित आन्दोलनरत पहिचान पक्षधर र सुरक्षाकर्मीबीच विराटनगरको रोडशेष चोकमा शनिबार पनि झडप भएको छ ।
झडपका कारण प्रहरीसहित १० जना घाइते भएका छन् ।
रोडशेष चोकबाट लगभग २ सय मिटर दक्षिणमा रहेको मुख्यमन्त्री तथा मन्त्रिपरिषद् कार्यालय अगाडिको बाटोलाई निषेधित क्षेत्र तोकेर आवतजावतमा रोक लगाइएको थियो ।
निषेधित क्षेत्र तोड्दै शवयात्रालाई अघि बढ्न खोजेपछि सुरक्षाकर्मीले रोक्ने क्रममा झडप भएको हो ।
झडप, अश्रुग्याँस प्रहार र लाठी प्रहारका बीच रोडशेष क्षेत्र तनावग्रस्त बनेको छ । झडपमा परी ६ जना प्रहरी र ४ जना आन्दोलनकारी घाइते भएको प्रहरीले जनाएको छ ।
एक जना प्रहरीको टाउकोमा चोट लागेको कारण न्युरो अस्पताल विराटनगरमा उपचारका लागि लगिएको छ ।
यस्तै, आन्दोलनकारीतर्फ घाइते भएका झापाको शिवसताक्षी नगरपालिका ८ का राजकुमार शेर्माको खुट्टामा चोट लागेको छ । आन्दोलनकारीले उनलाई प्रहरीले रबरको गोली हानेको बताएपनि प्रहरीले भने गोली प्रहार नगरेको जनाएको छ ।
मोरङ प्रहरीका एसपी दीपक पोखरेलका अनुसार निषेधाज्ञा तोड्ने क्रममा शेर्मालाई बारको ब्लेडले काटेको थियो ।
यस्तै, इटहरी २ का डेनिज राई, विराटनगर ८ का चन्द्रकुमार राई पनि घाइते भएका छन् । उनीहरू तीन जनाको विराटनगरस्थित पारस अस्पतालमा उपचार भइरहेको छ ।
आन्दोलनकारीले प्रहरीको अबरोध ताडेर मुख्यमन्त्री कार्यालयतिर अगाडि बढ्न खोजेपछि प्रहरीले अबरोध गरेको थियो । त्यसक्रममा भीड तितरवितर पार्न प्रहरीले ८१ सेल अश्रुग्याँस प्रहार गरेको जनाएको छ ।
Discussion about this post