मोरङ : मोरङमा लागूऔषध गाँजा बरामद गरिएको छ । नेपाल प्रहरी र सशस्त्र प्रहरीले मोरङबाट खटिएको टोलीले गाँजा बरामद गरेको हो । बुधबार एकैदिन ५ सय ४२ किलोग्राम गाँजा बरामद भएको हो ।
नेपाल प्रहरीले जहदा गाउँपालिकाबाट ४ सय २२ र सशस्त्र प्रहरीले विराटनगर महानगरपालिकाबाट १ सय २० किलोग्राम गाँजा बरामद गरेका हुन् ।
जहदा–२ बेरियारी टोलस्थित मोहमद मजेबुल मियाँको मकैबारीबाट ४ सय २२ किलो गाँजा बरामद गरिएको मोरङ प्रहरीका प्रवक्ता डीएसपी रन्जनकुमार दाहालले जानकारी दिए ।
उनका अनुसार प्रहरी निरीक्षक प्रकाश रेग्मीको नेतृत्वमा खटिएको इलाका प्रहरी कार्यालय रानी र लागूऔषध नियन्त्रण ब्यूरो विराटनगरको संयुक्त टोलीले गाँजा बरामद गरेको हो ।
मकैबारीमा लुकाएर राखेको अवस्थामा १४ वटा बोरामा प्याक गरेको गाँजा दिउँसो १२ः१५ बजेतिर फेला परेको दाहालको भनाइ छ ।
यस्तै, सशस्त्र प्रहरीले विराटनगर १ बाट १ सय २० किलोग्राम गाँजा बरामद गरेको छ । बीआर ११ भी ७६४५ नम्बरको स्कोरपिओमा राखेर भारततिर लैजाँदै गरेको अवस्थामा बिहानका राति २ः२० बजेतिर गाँजा बरामद गरिएको हो ।
भारतीय स्कोरपिओमा राखेर गाँजा भारत लैजाने काम भइरहेको सूचना कोसी प्रदेशका सशस्त्र प्रहरी प्रमुख डीआईजी अन्जनीकुमार पोखरेललाई पुगेको थियो । त्यसलगत्तै डीआईजी पोखरेलले स्कोरपिओलाई नियन्त्रणमा लिन टोली खटाए ।
सशस्त्र प्रहरी निरीक्षक भूपेन्द्रकाजी निरौला नेतृत्वको टोलीले इटहरीबाट विराटनगरतर्फ आइरहेको स्कोरपिओलाई मोरङको बूढीगंगा–१ मा रोक्न खोजेको थियो ।
तर, सशस्त्रको ‘चेक प्वाइन्ट’ छलेर भाग्यो । पिछा गर्दै आएको टोलीले स्कोरपिओलाई विराटनगर १ स्थितबाट नियन्त्रणमा लिएर खानतलासी गर्दा गाँजा फेला परेको हो । सशस्त्रलाई देख्नासाथ गाडी छाडेर चालक फरार बनेका छन् । उनको खोजी भइरहेको छ ।
‘गाँजाका सम्बन्धमा आवश्यक अनुसन्धान थालिएको छ,’ मोरङ प्रहरी प्रमुख एसपी दीपक पोखरेलले भने, ‘सशस्त्रसँग समन्वय गर्दै फरार रहेका स्कोरपिओ चालकको खोजी तीव्र पारिएको छ ।’
Discussion about this post