इटहरी : नेपाली कांग्रेस कोसी प्रदेश संसदीय दलले सरकारलाई दिएको समर्थन फिर्ता लिन माग राख्दै माओबादीलाई पत्र पठाएको छ ।
कांग्रेस संसदीय दलको बैठकले गरेको निर्णयअनुसार कांग्रेसले माओवादी केन्द्रलाई कोसी प्रदेश सरकारलाई दिएको समर्थन फिर्ता लिन भन्दै पत्र पठाएको हो ।
कांग्रेस संसदीय दलका नेता उद्वव थापाले माओवादी केन्द्र कोसी प्रदेश संसदीय दलका नेता इन्द्रबहादुर आङ्बोलाई पत्र लेख्दै गठबन्धन दलहरूको सरकार निर्माण गर्ने वातावरण तयार गर्न आग्रह गरेका हुन् । उक्त पत्र भने ५ गते पठाइएको भएपनि माओवादीको हातमा पुग्न ५ दिन लागेको हो ।
सरकार छाड्न मौखिक आग्रह गर्दा माओवादी र जसपाले नमानेपछि कांग्रेसले लिखित पत्र पठाएको हो ।
पत्रमा भनिएको छ, ‘संघीय सरकार र ६ वटा प्रदेश सरकारमा हालको गठबन्धन अनुसार नै सरकार गठन भैसकेको अवस्थामा गठबन्धन दलहरुको मर्म र भावना अनुरुप कोसी प्रदेशमा संघीय गठबन्धन अनुरुप नै सरकार गठन गर्नको लागि गठबन्धन दलहरुबाट सरकारलाई दिएको समर्थन फितां लिन अनुरोध गर्ने नेपाली कांग्रेस कोसी प्रदेश संसदीय दलको निर्णय बमोजिम तपाइंहरुको दलबाट हालको कोशी प्रदेश सरकारलाई दिएको समर्थन फिर्ता गरी गठबन्धन दलहरुको सरकार निर्माण गने वातावरण तय गर्नुहुन आग्रह गर्दछु ।’
संघीय सरकार र ६ वटा प्रदेश सरकारमा हालको गठबन्धनअनुसार नै सरकार गठन भइसकेको अवस्था छ । गठबन्धन दलहरुको मर्म र भावना अनुरुप कोसी प्रदेशमा संघीय गठबन्धन अनुरुप नै सरकार गठन गर्नको लागि गठबन्धन दलहरूबाट सरकारलाई दिएको समर्थन फिर्ता लिन अनुरोध गरिएको छ ।
माओवादी केन्द्र दलका नेता आङ्बोले भने उक्त पत्रबारे प्रधानमन्त्री तथा पार्टीका केन्द्रीय अध्यक्ष पुष्पकमल दाहाललाई जानकारी गराउने बताएका छन् ।
‘काँग्रेस संसदीय दलबाट आएको पत्र पार्टी अध्यक्ष तथा प्रधानमन्त्रीलाई जानकारी गराउँछु,’ उनले भने, ‘गठबन्धनको शीर्ष तहमा हुने सहमति र समझदारीलाई माओवादी प्रदेश संसदीय दलले कार्यान्वयन गर्नेछ ।’
९३ सदस्यीय प्रदेशसभामा बहुमतका लागि ४७ मत आवश्यक पर्छ । कोशी प्रदेशमा एमालेको ४० सिट, कांग्रेसको २९ सिट, माओबादी केन्द्रको १३ (सभामुखसहित), राप्रपाको ६ सिट, नेकपा एकीकृत समाजवादीको ४ सिट र जसपाको १ सिट रहेको छ ।
सभामुख बाहेक सत्तारुढ गठबन्धन र एमाले राप्रपा गठबन्धनसँग समान ४६ सांसद छन् ।
Discussion about this post