विराटनगर : कोसी प्रदेशका मुख्यमन्त्री उद्वव थापाले आज (सोमबार) विश्वासको मत लिदैँछन् ।
भदौ १ गते प्रदेशसभामा भदौ ३ गतेका लागि विश्वासको मत लिन सूची दर्ता गराएपनि उपसभामुख सिर्जना दनुवारले भदौ ४ गते आजका लागि समय तोकेकी थिइन् ।
गत साउन १६ गते दोस्रोपटक मुख्यमन्त्री भएका थापाले ३० दिनभित्र विश्वासको मत लिनुपर्ने संवैधानिक व्यवस्था छ ।
कोसी प्रदेशमा एमालेका हिक्मत कार्की नेतृत्वको सरकार ढलेपछि पछिल्लो पटक गत २१ असारमा सरकार गठन भएको थियो । त्यसबेला सभामुख रहेका बाबुराम गौतमसमेतको हस्ताक्षरसहित उनै थापा मुख्यमन्त्री बने । तर, सर्वोच्च अदालतले नियुक्ति बदर गरेको थियो ।
नियुक्ति बदर भएपनि पुनः उनै थापा मुख्यमन्त्रीमा दोहोरिए । सभामुख बाबुराम गौतमलाई राजीनामा गराएर थापा बहुमतसहितको मुख्यमन्त्री बने । सभामुखबाट राजीनामा दिएका गौतमलाई आर्थिक मामिला तथा योजना मन्त्री बनाइएको छ ।
९३ सदस्यीय प्रदेशसभामा सरकार गठनका लागि ४७ सदस्य आवश्यक पर्छ । थापालाई कांग्रेसका २९, माओवादी केन्द्रका १३, नेकपा एकीकृत समाजवादी पार्टीका ४ र जसपाका एक गरी ४७ प्रदेशसभा सदस्यको समर्थन छ । विपक्षमा भने नेकपा एमालेका ४० र राप्रपाका ६ सांसद छन् ।
Discussion about this post