सुनसरी : नेपाली कांग्रेसका सुनसरी जिल्लाका नेताहरूले पार्टी नेतृत्वप्रति चरम असन्तुष्टि व्यक्त गरेका छन् ।
शनिवार सङ्गठन विभाग प्रमुख सञ्जय श्रेष्ठले पार्टीको वर्तमान अवस्थाबारे बुझ्नका निम्ति कोसी टप्पुमा राखेको भेलामा अधिकांश वक्ताहरूले सुनसरी कांग्रेसको नेतृत्वप्रति असन्तुष्टि जनाएका हुन् ।
कांग्रेस सुनसरीका सभापति तथा इनरुवा नगरपालिकाका मेयर केदार भण्डारीको कार्यशैलीका कारण असन्तुष्टि जनाएका हुन् ।
जिल्ला समन्वय समिति सुनसरीका अध्यक्षसमेत रहेका इनरुवा नगरपालिकाका पूर्व मेयर राजन मेहताले पार्टी नेतृत्वका कारण सुनसरी कांग्रेस बदनाम भएको बताए ।
‘अहिले इनरुवाका चोक–चोकमा कांग्रेसी हो भनेर चिनाउन पनि लाज हुने अवस्था आयो,’ उनले भने, ‘म इनरुवाको मेयर हुँदा अल्पमत थियो । अहिले नगरपालिकामा काङ्ग्रेसकै बहुमत हुँदा पनि काम गर्न सकिरहेको अवस्था छैन ।’
पार्टी सभापति भण्डारी दोहोरो नेतृत्वमा रहेका कारण पनि जनताले चाहे अनुरूपको काम नभइरहेको नेताहरूको भनाइ छ ।
कांग्रेस सुनसरी क्षेत्र नं. ४ का सभापति ऐयुब अन्सारीले क्षेत्रमा जिल्ला नेतृत्व तहबाटै पटक पटक प्रहार भइरहेको बताए । उनले भने,‘सभापतिबाटै पटक पटक प्रहार हुँदा सङ्गठनलाई असर परेको छ । सामाजिक सञ्जालमा नेताहरूको नाम नै उल्लेख गरेर पटक पटक नकारात्मक गतिविधि भइरहेको छ, यसबारे पनि सोच्नुपर्ने बेला आएको छ ।’
हरिनगर गाउँपालिकाका अध्यक्ष तथा तथा कांग्रेस नेता गफार अन्सारीले अहिलेको जिल्ला पार्टी नेतृत्व बदनाम भएको जिकिर गरे । ‘पार्टी चलायमान बनाउने हो भने गुटगत हिसाबमा मात्र नभई सभापति ज्यु ले सबै हाम्रै कांग्रेसी हुन् भन्ने भावनाले अगाडि बढ्नुपर्छ,’ उनले भने ।
क्षेत्र नं. ४ का प्रदेशसभा सांसद षडानन्द मण्डलले जिल्ला पार्टीमा केही सीमित व्यक्तिहरूका कारण समस्या भइरहेको बताए । उनले पार्टी सभापतिको दोहोरो भूमिकाकै कारण पार्टी चलायमान बन्न नसकेको बताए ।
पार्टी सुनसरीका सचिव वीरेन्द्र साहले पार्टीले कार्यकर्तालाई जिम्मेवारी दिन नसकिरहेको बताए । जिम्मेवारी तोकिएको अवस्थामा कार्यकर्ताहरू काम गर्न तयार रहेको उनको भनाइ छ ।
‘कार्यकर्ताहरू काम गर्न चाहन्छन्, तर अवसर नपाइरहेको अवस्था छ,’ उनले भने, ‘काम गर्ने वातावरण बनाउने सभापतिले हो । सभापतिले आफ्ना आफन्तलाई मात्रै जिम्मेवारी दिनुहुँदैन । जनताका लागि काम गर्नुपर्छ ।’
कार्यक्रममा कांग्रेस केन्द्रीय सदस्य राजीव ढुंगानाले कांग्रेस एकजुट भएर जानुपर्ने बताए । कोही, कसैले पनि एक, अर्कालाई निषेधको राजनीति गर्न नहुने उनले बताए ।
सङ्गठन विभाग प्रमुखसमेत रहेका कांग्रेस नेता सञ्जय श्रेष्ठले नेतृत्वले काम गर्न नसकेको बताए । उनले पार्टीगत हिसाबमा कुनै पनि काम नभएको बताउँदै अब नेतृत्व नसच्चिए आफूहरू मैदानमा उत्रिएर जनताका काम गर्ने बताए । उनले नेतृत्वले कार्यवाहक दिनुपर्ने वा कसैलाई जिम्मेवारी दिनुपर्ने बताए ।
भेलामा प्रदेश सांसद इस्राइल मन्सुरी, पूर्व राज्यमन्त्री सीताराम मेहता, कोसी प्रदेशका पूर्व मुख्य न्यायधीवक्ता बुद्धि कटवालले वर्तमान जिल्ला नेतृत्वले पार्टी हितमा काम गर्न नसकेका कारण कार्यकर्तामा निराशा उत्पन्न भएको बताएका थिए ।
पार्टीमा द्धैष राखेकाहरूलाई पुनः जिम्मेवार पदमा ल्याइरहेको उदाहरण दिँदै उनीहरूले आफू निकटकालाई मात्रै च्याप्ने प्रवृत्तिको अन्त्य हुनुपर्ने बताएका थिए ।
कांग्रेस क्षेत्र नं. २ (ख) का सभापति श्यामलाल मेहता, दुहबी नगरपालिकाका नगर प्रमुख एव नगर सभापति वेद गच्छेदार, महासमिति सदस्य महेश दत्त, दीपक राई, जिल्ला सदस्यहरू लक्ष्मी ठाकुर,अशोक मेहता, अशोक यादव, बर्जू गाउँपालिका पूर्व अध्यक्ष रघुनन्दन चौधरी, मुस्लिम सङ्घका जिल्ला अध्यक्ष हारुण अन्सारी, युवा नेता सगेन चौधरी, तरुण दलका केन्द्रीय सदस्य देवेन्द्र लिम्बू, नेपाल विद्यार्थी सङ्घ सुनसरी सभापति प्रमोद भट्टराई, वराहक्षेत्र नगरपालिकाका वडाध्यक्षहरू तेज गुरुगं,रोशन खडका लगायत दुई दर्जन बढी नेताहरूले बोलेका थिए ।
बोल्ने अधिकांश वक्ताहरूले जिल्ला पार्टी नेतृत्वले पार्टीलाई गतिशील बनाउन नसकेको आरोप लगाए । उनीहरूले पार्टीलाई चलायमान बनाउन नसक्दा समग्र कार्यकर्ताहरुमा निराशा उत्पन्न भएको बताएका थिए ।
Discussion about this post