इटहरी : इटहरीमा जारी स्व. कृष्णप्रसाद भट्टराई स्मृति कोसी प्रदेशस्तरीय फुटबल प्रतियोगिताको अन्तिम क्वाटरफाइनल खेलमा सिधुँवा सिंहदेवी फुटबल क्लब, धनकुटा सेमिफाइनलमा प्रवेश गरेको छ ।
मंगलबार जनता बहुमुखी क्याम्पसको खेल मैदानमा भएको अन्तिम क्वाटरफाइनल खेलमा आयोजक द योङ्ग ब्रदर्श क्लब इटहरीलाई ट्राइबेकरमा ४–२ गोल अन्तरले पराजित गर्दै सिधुँवा सिंहदेवी सेमिफाइनलमा प्रवेश गरेको हो ।
निर्धारित समयमा गोलरहित बराबरी भएपछि खेल ट्राइबेकरमा धकेलिएको थियो ।
सिधुँवा सिंहदेवी फुटबल क्लबका लागि अभिषेक लिम्बू, बुद्ध चेम्जोङ, असीम राई र आशिष चौधरीले १–१ गोल गरे । यसैगरी आयोजक द योङ्ग ब्रदर्श क्लबका लागि महिन्द्र याख्या र विजय राईले १–१ गोल गरे भने सुमित चौधरी र योगेन्द्र कार्कीको प्रहार सिधुँवाका गोल किप्पर राजीव क्षेत्रीले रोक्न सफल भए ।
खेलको निर्धारित समयमा दुवै टिमबाट गोल गर्ने प्रयास भएपनि गोल हुन सकेन । सिधुँवाका लागि पटकपटक गोल गर्ने अवसर आएपनि गोल हुन सकेन । यसैगरी आयोजकले पनि पटकपटक प्रहार गरेपनि गोल नभएपछि निर्धारित समयमा गोलरहित बराबरीमा टुंगिएको थियो ।
खेलको म्यान अफ दि म्याच सिधुँवाका गोल किप्पर राजीव क्षेत्री घोषित हुँदै नगद पाँच हजारसहित ट्रफी हात पारे ।
द योङ्ग ब्रदर्श क्लब इटहरीको आयोजनामा भइरहेको खेलमा अब बुधबार पहिलो सेमिफाइनल खेल बिटिएफसी (भगिमान तुम्बाहाम्फे फुटबल क्लब)तेह्रथुम र दमक फुटबल क्लब झापाबीच प्रतिष्पर्धा हुनेछ ।
आयोजकका अध्यक्ष विजय सुब्बाका अनुसार कोसी प्रदेशका आठ वटा टिम सहभागी भएको प्रतियोगितामा विजेता टिमले नगद दुई लाख ११ हजार र उपबिजेता टिमले नगद एक लाख ११ हजारसहित ट्रफी, मेडल र प्रमाणपत्र प्राप्त गर्नेछन् ।
माघ २० गतेसम्म सञ्चालन हुने खेलमा कूल २० लाख खर्च हुने अनुमान गरिएको छ ।
Discussion about this post