विराटनगर : विराटनगरमा स्टाफ नर्सको हत्या भएको छ । हत्या गरेको अवस्थामा स्टाफ नर्सको शव फेला परेको प्रहरीले जनाएको छ ।
विराटनगर महानगरपालिका ४ मा डेरा गरी बस्दै आएकी २२ वर्षीया चन्द्रिकाकुमारी दासको हत्या भएको मोरङ प्रहरीका प्रवक्ता डीएसपी रन्जनकुमार दाहालले पुष्टि गरे ।
दास विराटनगरको नोबेल शिक्षण अस्पतालमा कार्यरत स्टाफ नर्स हुन् । सिराहाको फुल्काहकट्टी घर भएकी उनी अस्पताल नजिक धीरेन्द्र गिरीको घरमा डेरा बस्दै आएकी थिइन् ।
डेरा बसेको घरको कोठाभित्रको शौचालयमा आज (शुक्रबार) दिउँसो १२ बजेतिर शव फेला परेको दाहालले बताए ।
उनका अनुसार धारिलो हतियार प्रहार गरेर हत्या गरेपछि शौचालयमा फालेको अवस्थामा शव भेटिएको हो । दासको घाँटी, अनुहारलगायत शरीरका विभिन्न भागमा धारिलो हतियारले हानेको गहिरो चोट छ ।
हत्यामा संलग्नको पहिचान खुल्न बाँकी छ। घटनामा संलग्नको खोजी कार्य अगाडि बढाएर घटनाबारे थप अनुसन्धान सुरु गरिएको प्रहरीले जनाएको छ ।
Discussion about this post