खोटाङ : खोटाङमा एसईई परीक्षामा मोबाइल फोटो खिचेर म्यासेन्जरबाट प्रश्नपत्र बाहिर पठाएर चिट चोरेको आरोपमा तीन जना विद्यार्थी निष्कासित भएका छन् ।
दिक्तेल रूपाकोट मझुवागढी नगरपालिका १२ जालपास्थित जालपा मावि केन्द्रमा मोबाइलसहित तीन जना विद्यार्थी बिहीबार निष्कासित भएका हुन् ।
शिक्षा विकास तथा समन्वय इकाइ खोटाङका निमित्त प्रमुख नन्दबहादुर विश्वकर्माका अनुसार बिहीबार परीक्षा अनुगमनको क्रममा मोबाइलमा म्यासेन्जर ग्रुप बनाएर चिट चोरिरहेको भेटिएपछि तीन जनालाई निष्कासित गरिएको हो ।
फरक–फरक दुई कोठामा मोबाइलमार्फत चिट चोरिरहेको र दुवै कोठाका निरीक्षकलाई समेत हटाइएको विश्वकर्माले बताए ।
उनका अनुसार दिक्तेल रूपाकोट मझुवागढी नगरपालिका–१० पाथेकास्थित सरस्वती माविका हरिप्रसाद भट्टराई र ११ खार्मीस्थित कालिका माविकी सुमना दाहाललाई हटाइएको हो ।
ऐच्छिक प्रथम अर्थशास्त्र विषयको ‘इकोनोमिक्स ग्रुप’ बनाएर परीक्षार्थीले प्रश्नपत्र पठाउने र कालिका मावि खार्मीका प्रधानाध्यापक प्रकाश राईले बाहिरबाट उत्तर पठाइरहेको पाइएको विश्वकर्माले पुष्टि गरे ।
त्यस्तै, सरस्वती माविका विद्यार्थीको मोबाइलमा ‘क्लास टेन स्टुडेन्ट’ नामक नामक म्यासेन्जर ग्रुपबाट प्रश्नपत्र पठाउने र उत्तर आउने गरेको समेत विश्वकर्माले बताए ।
एउटै परीक्षा केन्द्रमा दुईवटा विद्यालयका परीक्षार्थीहरू रहेको र सरस्वती माविका विद्यार्थीको मोबाइलमा भने कसले उत्तर पठाएको भन्नेबारे खुल्न बाँकी रहेको बताइएको छ । निष्कासित भएका तीनै जना परीक्षार्थीको बिहीबारको परीक्षा रद्द गरिएको छ ।
विद्यार्थीको नाम तत्काल गोप्य राखिएको र उनीहरूलाई शुक्रबारको परीक्षामा समावेश गरिने विश्वकर्माले जानकारी दिए ।
Discussion about this post