सुनसरी : सप्तरीको तिरहुत गाउँपालिका–३ गोईठीबाट आइतबारदेखि हराइरहेका चार जना बालबालिकालाई सशस्त्र प्रहरीले फेला पारी अभिभावकको जिम्मा लगाएको छ।
सुनसरी र सप्तरीको सिमानामा पर्ने कोशी ब्यारेज क्षेत्रबाट उनीहरूलाई उद्धार गरिएको हो।
आवश्यक सोधपुछ तथा समन्वयपछि सोमबार बालबालिकालाई अभिभावकको जिम्मा लगाइएको सशस्त्र प्रहरी बल नेपाल नम्बर ६ गण सप्तरीका निमित्त प्रमुख सशस्त्र प्रहरी उपरीक्षक उज्वल लामिछानेले जानकारी दिए।
अभिभावकको जिम्मा लगाइएका बालबालिकामा सप्तरी तिरहुत गाउँपालिका–३ गोईठीकी ७ वर्षीया श्रीष्ठी कुमारी सरदार, सोही स्थानकी करिब ७ वर्षीया कुमारी सरदार, ८ वर्षीया आरोसी सरदार र करिब ६ वर्षीय कृष्ण सरदार रहेका छन्।
प्रहरीका अनुसार बालबालिकाको अवस्था सामान्य रहेको छ।
Discussion about this post