इटहरी : इटहरीमा शनिवार (भोलि) साहित्य उत्सव हुँदै छ ।
प्रकाशन गृह फाइनप्रिन्टद्धारा प्रकाशित प्रकाशित पुस्तकका लेखकहरूसँग अन्तरक्रिया आयोजना हुने शुक्रवार पत्रकार सम्मेलन गरी जानकारी दिइयो ।
इटहरीस्थित दुर्गा पार्टी प्यालेसमा शनिवार बिहान १० बजेदेखि सुरु हुने कार्यक्रममा महानायक राजेश हमालसहित ६ जना लेखक सहभागी हुँदैछन् ।
महानायक हमालको पुस्तक युगदेखि युगसम्म पुस्तकमा केन्द्रीत रही कवि मनु मञ्जिलले अन्तरक्रिया गर्नेछन् ।
यसैगरी २०८१ को मदन पुरस्कार विजेता उरमालका लेखक छुदेन काविमोसँग नाट्यकर्मी प्रज्वल पराजुलीले अन्तरक्रिया गर्नेछन् ।
यस्तै, २०८१ को पद्यश्री पुरस्कार विजेता पुस्तक छालबाटोका लेखक रमेश भुसालसँग डा.अस्मिता विष्टले सहजीकरण गर्ने पत्रकार सम्मेलनमा जानकारी दिइयो ।
यस्तै, डा. नवराज केसीको पुस्तक स्वस्पर्शमा केन्द्रीत रही नाट्यकर्मी सोनु जयन्तीले सहजीकरण गर्नेछन् ।
यसैगरी ददि सापकोटाको पुस्तक ज्ञानिकामाथि पत्रकार मिलन बुढाथोकीले सहजीकरण गर्नेछन् ।
यस्तै, सुबिन भट्टराईको चमेलीको फूल, बैजनी रुमालमाथि कवि धीरज राईले सहजीकरण गर्नेछन् ।
पुस्तकको अन्तरक्रियाअघि ११ जना कविहरूले कविता वाचन गर्ने कार्यक्रम तय भएको फाइनप्रिन्टका सञ्चालक नीरज भारीले बताए ।
उक्त कार्यक्रमले पठन संस्कृतिको प्रवर्द्धनमा टेवा पुर्याउने उनको विश्वास छ । साहित्य, पुस्तक र पाठकलाई एउटै मञ्चमा जोड्ने उद्देश्यले कार्यक्रम हुन लागेको उनले बताए ।
काव्य डबली र शब्द प्रवाहको सहकार्यमा इटहरीमा हुन लागेको फाइनप्रिन्ट फिभरमा सहभागी हुन कुनै शुल्क नलाग्ने बताइएको छ ।
Discussion about this post