हिमाल आरोहणमा नेपालीहरूको वर्चस्वलाई निरन्तरता दिँदै व्यवसायिक तथा दक्ष आरोही उत्पादन गर्ने उद्देश्यसहित खुम्बु क्लाईबिङ सेन्टर, सोलुखुम्बुले १५ दिने उन्नत हिमाल आरोहण तालिम सफलतापूर्वक सम्पन्न गरेको छ।
नयाँ तथा अनुभवी आरोहीहरूको सीप तिखार्ने र क्षमतामा निखार ल्याउने उद्देश्यले आयोजना गरिएको तालिममा महिला र पुरुष गरी ७० जनाको सहभागिता रहेको आयोजक संस्थाले जनाएको छ।
तालिम सन् २०२६ जनवरी १५ देखि २९ सम्म खुम्बु क्षेत्रको फोर्त्सेमा सञ्चालन गरिएको थियो।
नेपालका पर्वतारोहण क्षेत्रमा प्राविधिक दक्षता अभिवृद्धि गर्नुका साथै सुरक्षाका मापदण्ड सुधार गर्ने लक्ष्यसहित तालिम आयोजना गरिएको हो।
कार्यक्रममा उन्नत पर्वतारोहण प्रविधि, आपतकालीन उद्धार तथा प्रतिक्रिया प्रणाली, उच्च हिमाली क्षेत्रमा कार्य गर्दा अपनाउनुपर्ने सुरक्षा उपाय तथा वातावरणीय संरक्षणसम्बन्धी अभ्यासहरूमा विशेष जोड दिइएको थियो।
तालिममार्फत हिमालय क्षेत्रमा हुने पर्वतारोहणका क्रममा दुर्घटना न्यूनीकरण गर्नुका साथै समग्र सुरक्षास्तर अभिवृद्धि गर्ने अपेक्षा खुम्बु क्लाईबिङ सेन्टरले लिएको जनाएको छ।
पर्यटन तथा साहसिक खेलकुद नेपालको अर्थतन्त्रको महत्वपूर्ण आधार भएकाले यस क्षेत्रको व्यवसायिकता र विश्वसनीयता बढाउन तालिम सहयोगी हुने विश्वास गरिएको छ।
सगरमाथा नजिकै अवस्थित फोर्त्से उच्च उचाइको भू–भागसँग नजिक र समृद्ध पर्वतारोहण इतिहास भएको क्षेत्र भएकाले तालिमका लागि उपयुक्त मानिएको आयोजकको भनाइ छ।
जनवरी महिनाको चिसो समयमा तालिम सञ्चालन गर्नुको उद्देश्य सहभागीहरूलाई कठोर मौसममा काम गर्न अभ्यस्त बनाउनु रहेको जनाइएको छ।
खुम्बु क्लाईबिङ सेन्टरको यो पहलले अन्तर्राष्ट्रिय सुरक्षामापदण्डअनुसार स्थानीय चुनौतीहरूलाई सम्बोधन गर्दै आएको उल्लेख गरिएको छ। अपर्याप्त तालिमका कारण नेपाली पर्वत गाइड तथा आरोहीहरू जोखिममा पर्ने अवस्थालाई कम गर्ने लक्ष्यसहित कार्यक्रम सञ्चालन गरिएको हो।
तालिममा यसअघि मुस्ताङस्थित हिमलुङ हिमालमा महिलाहरूको टोलीको नेतृत्व गर्दै सफल आरोहण गरेकी फुरादिकी शेर्पा, चार दिनमै सगरमाथाको चुचुरोमा पुग्न सफल तथा मकालु हिमाल आरोहणमा नेपालकै कान्छी आरोहीको कीर्तिमान बनाएकी किपालामु शेर्पालगायत २८ जना महिला र ४२ जना पुरुष आरोहण गाइडहरूको सहभागिता रहेको थियो।
Discussion about this post