इटहरी : आगामी फागुन २१ गते हुने प्रतिनिधिसभा निर्वाचनलाई स्वच्छ, निष्पक्ष र सुरक्षित बनाउन कोशी प्रदेशका सीमावर्ती क्षेत्रमा उच्च सतर्कता अपनाइने भएको छ।
निर्वाचनलाई प्रभावित पार्न सक्ने सीमापार गतिविधि नियन्त्रण गर्न नेपाल–भारत सीमा नाका ७२ घण्टाका लागि पूर्ण रूपमा बन्द गर्ने निर्णय गरिएको हो।
भारतसँग सीमा जोडिएका झापा, मोरङ र सुनसरी जिल्लाका सुरक्षा प्रमुख तथा ती जिल्लासँग सीमा जोडिएका भारतका किशनगञ्ज, अररिया र सुपौल जिल्लाका सुरक्षा अधिकारीहरूबीच सम्पन्न समन्वय बैठकले उक्त निर्णय गरेको हो।
बैठकको सहमति अनुसार फागुन १८ गते रातिदेखि फागुन २१ गते रातिसम्म सीमा नाका बन्द रहनेछ।
यस अवधिमा अत्यावश्यक सेवाबाहेक सबै प्रकारका आवतजावतमा कडाइ गरिनेछ, जसले चुनावी प्रभाव पार्ने बाह्य हस्तक्षेप र अवैध गतिविधि नियन्त्रणमा सहयोग पुग्ने अपेक्षा गरिएको छ।
मोरङका सहायक प्रमुख जिल्ला अधिकारी सरोज कोइरालाका अनुसार नेपाली पक्षले निर्वाचन प्रचारप्रसारका नाममा भारतीय नम्बर प्लेटका सवारी साधनको अनावश्यक प्रवेश रोक्न भारतीय सुरक्षा निकायसँग सहयोग मागेको छ।
सुरक्षा र प्रशासनिक निकायको संयुक्त बैठकले सीमा क्षेत्रमा संयुक्त गस्ती बढाउने, तेस्रो मुलुकका नागरिकको अनधिकृत आवागमन रोक्ने तथा लागूऔषध ओसारपसार, मानव बेचबिखन, नक्कली मुद्रा, हातहतियार र अवैध नगद तस्करीजस्ता सीमापार अपराध नियन्त्रणमा कडाइ गर्ने प्रतिबद्धता समेत जनाएको छ।
निर्वाचनको समयमा सीमालाई ‘सुरक्षा संवेदनशील क्षेत्र’का रूपमा लिँदै अपनाइएको यो रणनीतिले कोशी प्रदेशमा हुने निर्वाचन परिणाममाथि बाह्य प्रभाव पर्न नदिन निर्णायक भूमिका खेल्ने सुरक्षा अधिकारीहरूको विश्वास छ।
Discussion about this post