इलाम : कोशी प्रदेशका मुख्यमन्त्री हिक्मत कुमार कार्कीले कोशी प्रदेशमा युवालाई लक्षित गरी उदय परियोजना सञ्चालन गरिएको बताएका छन्।
इलामको सूर्योदय नगरपालिका–३ बौद्धधाममा निर्माण गरिएको बुद्धको प्रतिमासहितको पार्कको उद्घाटन गर्दै बुधबार मुख्यमन्त्री कार्कीले नवप्रर्वतन कार्यक्रममार्फत प्रदेशका युवा उद्यमीलाई लक्षित गरी उदय परियोजना सञ्चालन गर्न लागिएको बताएका हुन् ।
कोशी प्रदेश, संघीय सरकार र सूर्योदय नगरपालिकाको आठ करोड हाराहारी लगानीमा निर्माण भएको ६५ फिट अग्लो बुद्धको प्रतिमासहितको पार्क निर्माण थालिएको ११ वर्षमा सञ्चालनमा आएको हो ।
१७ रोपनी क्षेत्रफलमा निर्माण भएको पार्क नेपाल, भारत लगायत तेस्रो देशका पर्यटकका लागि प्रमुख गन्तव्य भएको गौतम बुद्ध स्मृति प्रतिष्ठानका अध्यक्ष लाकेल लामाले जानकारी दिए ।
नेपाल भारत सीमा क्षेत्र पशुपतिनगरबाट २ किलोमिटरको दूरीमा रहेको बौद्धधाममा अहिले भारतीय पर्यटकको आकर्षणको केन्द्र बनेको छ ।
मुख्यमन्त्री कार्कीले युवा लक्षित उदय परियोजना कार्यक्रम बिहीबार इटहरीमा हुने कार्यक्रममार्फत शुभारम्भ गरिने जानकारी दिए । उनले उक्त कार्यक्रममा लगानी गर्नका लागि कोशी प्रदेशका विभिन्न बैंकको छनौट गर्ने काम सम्पन्न भैसकेकाले साना, मझौला युवा उद्योगीले सहजै ३० लाखदेखि तीन करोड सम्म सहुलियत ब्याजदरमा ऋण पाउने जानकारी दिए ।
कोशी प्रदेश सरकारले स्वीस सरकार संगको समन्वयमा आर्थिक बर्ष २०८२।८३ को बजेटमा आठ अर्ब रकम बिनियोजन गरिएको कार्कीले बताए ।
मुख्यमन्त्री कार्कीले भने ‘युवालाई उद्योग संचालन गर्न सहयोग गरी व्यावसायिक बनाउनका लागि प्रदेश सरकारले दुई बर्ष भित्रमा आठ करोड रुपियाँ लगानी गर्ने योजना बनाएको छ। यसले बेरोजगारी समस्या समेत समाधान गर्ने छ ।’
हिमाली र पहाडी जिल्लामा सहुलियतमा १० लाख सम्म ऋण उपलब्ध गरा र ३० देखि ४० प्रतिशत धितोमा उक्त ऋण प्रवाह गरिने कार्कीले जानकारी दिए ।
कोशी प्रदेश सरकारले गत वर्षदेखि युवालाई लक्षित गरी ब्याज अनुदान कार्यक्रम समेत सञ्चालन गर्दै आएको उनले बताए । प्रदेशले कृषि मन्त्रालय मार्फत ६ करोड रुपियाँ रकम बिनियोजन गरी शुरु गरेको ब्याज अनुदान कार्यक्रममा १५० बढी परियोजना संचालनमा रहेका छन ।
उक्त ब्याज अनुदान कार्यक्रममा जम्मा लगानीको छ प्रतिशत रकम प्रदेश सरकारले व्यहोर्दै आएको मुख्यमन्त्री कार्कीले जानकारी दिए ।
Discussion about this post