धरान : धरानस्थित बीपी कोइराला स्वास्थ्य विज्ञान प्रतिष्ठानमा कर्मचारी कल्याण समाजको नयाँ कार्यसमिति चयन भएको छ।
प्रतिष्ठानको विधान २०७२ अनुसार सम्पन्न निर्वाचनमा कुल २४ पदका लागि ३९ जना उम्मेदवार प्रतिस्पर्धामा उत्रिएका थिए। कुल १,५५४ मतदातामध्ये १,३०८ मत खसेको थियो।
निर्वाचन परिणामअनुसार सञ्जीव कुमार कर्णले ६५४ मत प्राप्त गर्दै अध्यक्ष पदमा निर्वाचित भएका छन्। उनका निकटतम प्रतिद्वन्द्वी अविरमान राईले ६२२ मत प्राप्त गरेका थिए।
यसैगरी वरिष्ठ उपाध्यक्षमा श्याम सुन्दर मेहेता (५०० मत), वरिष्ठ उपाध्यक्ष (महिला)मा निशा श्रेष्ठ निर्विरोध, उपाध्यक्ष (प्रशासन) मा पञ्चमाया ताम्ली (४७० मत), उपाध्यक्ष (पारामेडिक्स)मा प्रेम कुमार श्रेष्ठ (५८६ मत), उपाध्यक्ष (नर्सिङ)मा निर्मला बास्तोला निर्विरोध निर्वाचित भएका छन्।
महासचिवमा संगीता कुमारी चौधरी (६१८ मत), सचिवमा नितु चौधरी (७३३ मत) र कोषाध्यक्षमा रमा बस्नेत (७०० मत) निर्वाचित भएका छन्।
विभिन्न समूहतर्फ सदस्यहरूसमेत चयन भएका छन्, जसमा केही पदमा निर्विरोध निर्वाचन भएको छ।
निर्वाचन चिफ लाइब्रेरियन विनोद कुमार यादवको अध्यक्षतामा गठित ७ सदस्यीय निर्वाचन समितिले सम्पन्न गरेको हो। नवनिर्वाचित कार्यसमितिको कार्यकाल ३ वर्षको रहनेछ।
Discussion about this post