इटहरी : इटहरी रंगशालामा १६औँ अन्तर्राष्ट्रिय आमन्त्रण ‘रेडबुल इटहरी गोल्डकप’ फुटबल प्रतियोगिता आज (सोमबार)देखि सुरु हुँदैछ।
प्रतियोगिताको उद्घाटन खेलमा साँझ ६ः३० मा पाहुना टोली जस्ट जोन फुटबल क्लब नाइजेरिया र युवा समाज मोरङबीच प्रतिस्पर्धा हुँदै छ।
रात्रिकालीन रूपमा आयोजना हुने खेलमा विदेशी टोली जस्ट जोन र घरेलु टोली युवा समाजबीचको भिडन्त प्रतिस्पर्धात्मक हुने अनुमान गरिएको छ।
वैशाख ७ गतेसम्म सञ्चालन हुने प्रतियोगिताको विजेताले १० लाख रुपैयाँ नगदसँगै ६० तोला चाँदी र ६ आना सुनले लेपन गरिएको ट्रफी प्राप्त गर्नेछन् भने उपविजेताले ५ लाख रुपैयाँ पाउनेछन्।
यस्तै, सर्वोत्कृष्ट खेलाडीलाई १ लाख रुपैयाँ, प्रत्येक खेलको ‘म्यान अफ द म्याच’लाई १० हजार रुपैयाँ प्रदान गरिनेछ। उत्कृष्ट गोलरक्षक, डिफेन्डर, मिडफिल्डर, स्ट्राइकर र प्रशिक्षकलाई जनही २० हजार रुपैयाँ तथा सर्वाधिक गोलकर्तालाई २५ हजार रुपैयाँ पुरस्कार राखिएको छ।
राष्ट्रिय जागृति क्लब इटहरीको आयोजनामा हुने प्रतियोगितामा नेपाल र विदेशका गरी ८ टोली सहभागी छन्।
जसमा मच्छिन्द्र फुटबल क्लब, प्लानिङ ब्वाइज क्लब, झापा–११, सातदोबाटो फुटबल क्लब, युवा समाज मोरङ, आयोजक राष्ट्रिय जागृति क्लब, यूकेएफसी भारत र जस्ट जोन फुटबल क्लब नाइजेरिया रहेका छन्।
Discussion about this post