ताप्लेजुङ : प्रसिद्ध धार्मिक तीर्थस्थल पाथीभरा मन्दिरमा भक्तजनले चढाएको करोडौँ रुपैयाँ भेटी प्रहरीको रोहबर तथा सीसीटीभी निगरानीमा दैनिक गणना गरी बैंकमा जम्मा गरिने गरिएको छ।
पाथीभरा क्षेत्र विकास समितिका अनुसार चालु आर्थिक वर्षको जेठ मसान्तसम्म मन्दिरमा ४ करोड ४९ लाख रुपैयाँभन्दा बढी भेटी सङ्कलन भएको छ। जेठ महिनामा मात्रै ४६ लाख ६० हजार ६ सय रुपैयाँ भेटी प्राप्त भएको समितिले जनाएको छ।
समितिका कार्यकारी निर्देशक प्रजिन हाङबाङका अनुसार मन्दिरमा भक्तजनले चढाएको भेटी कर्मचारीले नेपाल प्रहरीको रोहबरमा सङ्कलन गरी सुरक्षित रूपमा पोका बनाएर लाहाछाप लगाइन्छ। त्यसपछि उक्त भेटी माथिल्लो फेदी हुँदै सदरमुकाम फुङलिङस्थित समितिको कार्यालयमा ल्याइन्छ।
कार्यालयमा भेटी रकम दैनिक रूपमा प्रहरीको उपस्थितिसँगै सीसीटीभी निगरानीमा गणना गरिन्छ। गणना सम्पन्न भएपछि रकम बैंकमा जम्मा गर्ने व्यवस्था गरिएको समितिले जनाएको छ। यस प्रक्रियाले भेटी व्यवस्थापनलाई सुरक्षित र पारदर्शी बनाएको विश्वास गरिएको छ।
समितिका अनुसार जेठ महिनामा ८ हजार ३ सय ८७ जना तीर्थयात्री पाथीभरा पुगेका छन्। चालु आर्थिक वर्षको जेठ मसान्तसम्म मन्दिर दर्शन गर्ने भक्तजनको संख्या एक लाख ८८ हजार ६ सय पुगेको छ।
समितिले बढ्दो तीर्थयात्रीको आगमनसँगै भेटी व्यवस्थापनलाई थप व्यवस्थित, सुरक्षित र पारदर्शी बनाउन आवश्यक प्रविधि तथा निगरानी प्रणालीलाई निरन्तर सुदृढ गर्दै आएको जनाएको छ।
Discussion about this post