धनकुटा : भारतीय नम्बरको कारमा नेपाली नम्बर प्लेट जडान गरी सञ्चालन गरिएको सवारी धनकुटाको भेडेटारमा प्रहरीले फेला पारेपछि जाली नम्बर प्लेट प्रयोगको घटना सार्वजनिक भएको छ।
साँगुरीगढी गाउँपालिका–६ भेडेटारमा नियमित सवारी जाँचका क्रममा धनकुटाबाट धरानतर्फ जाँदै गरेको एउटा सेतो कार रोकेर परीक्षण गर्दा भारतीय नम्बर बीआरएजी ६६०२ भएको सवारीमा नेपाली नम्बर प्रदेश १–०१–००१ च ९२९४ को नम्बर प्लेट राखेर सञ्चालन गरिएको भेटिएको प्रहरीले जनाएको छ।
प्रहरीका अनुसार कार चालक भारतको बिहार राज्य, जोगवनी थाना अन्तर्गत अमोना पञ्चायत–२१ मिरगञ्जका २२ वर्षीय नन्दुकुमार चौधरी हुन्। उनलाई नक्कली नम्बर प्लेट प्रयोग गरेको आरोपमा पक्राउ गरिएको छ।
प्रहरीले कारसहित चालकलाई जिल्ला प्रहरी कार्यालय धनकुटामा ल्याएर आवश्यक अनुसन्धान गरेको र पछि यातायात व्यवस्था ऐन, २०४९ को दफा १६० बमोजिम कारबाहीका लागि यातायात व्यवस्था सेवा कार्यालय धनकुटा पठाएको जनाएको छ।
प्रहरीले सवारी जाँचका क्रममा जाली नम्बर प्लेट प्रयोग गरी सवारी सञ्चालन गर्ने गतिविधिप्रति निगरानी कडा बनाइएको जनाएको छ।
यस्ता गतिविधिले सवारीको वास्तविक पहिचान लुकाउनुका साथै कानुनी प्रक्रिया र सुरक्षा व्यवस्थामै चुनौती सिर्जना गर्ने भएकाले थप अनुसन्धान भइरहेको प्रहरीले जनाएको छ।
Discussion about this post