विराटनगर : कोशी प्रदेशका मुख्यमन्त्री हिक्मतकुमार कार्कीले प्रदेशसभाबाट विश्वासको मत प्राप्त गरेका छन्। सोमबार प्रदेशसभामा भएको मतदानमा कार्कीको पक्षमा ५७ मत परेको हो।
विश्वासको मतको पक्षमा नेकपा एमाले र नेपाली कम्युनिस्ट पार्टी (नेकपा)का प्रदेशसभा सदस्यले मतदान गरेका छन्। प्रदेशसभामा एमालेका ४० र नेकपाका १७ सदस्य छन्।
विश्वासको मतको विपक्षमा नेपाली कांग्रेसका प्रदेशसभा सदस्यले मतदान गरेका छन्। कांग्रेसका २९ प्रदेशसभा सदस्य रहे पनि विपक्षमा २२ मत परेको छ। अन्य सांसद अनुपस्थित थिए ।
राष्ट्रिय प्रजातन्त्र पार्टी (राप्रपा)का सभामुखसहित पाँच प्रदेशसभा सदस्यले मतदानमा भाग लिएनन्। जनता समाजवादी पार्टी (जसपा)की एक मात्र प्रदेशसभा सदस्य निर्मला लिम्बु पनि बैठकमा उपस्थित भइनन्।
९३ सदस्यीय कोशी प्रदेशसभामा एक सदस्यले राजीनामा दिएपछि हाल ९२ सदस्य छन्। सोमबारको बैठकमा ८३ प्रदेशसभा सदस्य उपस्थित थिए।
विश्वासको मत पाएसँगै मुख्यमन्त्री कार्की नेतृत्वको सरकारलाई निरन्तरता दिने बाटो खुलेको छ।
Discussion about this post