इटहरी : राष्ट्रिय जनसहयोग कलेजको १२औँ कलेज सभा विभिन्न कार्यक्रमसहित सम्पन्न भएको छ ।
कोशी प्रदेशका सामाजिक विकासमन्त्री गीता तिम्सिनाको प्रमुख आतिथ्यमा सम्पन्न सभामा कलेजको शैक्षिक प्रगति, आगामी योजना, बजेट तथा संस्थागत विकासका विषयमा छलफल गरिएको थियो ।
सभामा त्रिभुवन विश्वविद्यालय परीक्षा नियन्त्रण कार्यालयका पूर्वाञ्चल प्रमुख प्रा. डा. गोविन्द गुरागाईं, पब्लिक क्याम्पस संघ कोशी प्रदेशका अध्यक्ष अर्जुनराज अधिकारी, इटहरी उपमहानगरपालिकाकी उपप्रमुख संगीता चौधरी र इटहरी–२० का वडाध्यक्ष मणिराम श्रेष्ठ विशिष्ट अतिथिका रूपमा सहभागी थिए ।
त्यसैगरी विभिन्न राजनीतिक दलका प्रतिनिधि, नागरिक समाजका अध्यक्ष, विभिन्न संघसंस्थाका प्रमुख तथा प्रतिनिधि, क्याम्पस प्रमुख, विद्यालयका प्रमुख तथा अध्यक्ष, कलेज सभाका सदस्य, आजीवन तथा संरक्षक सदस्य, प्राध्यापक, कर्मचारी र विद्यार्थीहरूको उपस्थिति रहेको थियो ।
सभामा क्याम्पस प्रमुख द्रोणबहादुर न्यौपानेले कलेजको वार्षिक प्रगति प्रतिवेदन प्रस्तुत गरेका थिए । उनले कलेजको शैक्षिक, प्रशासनिक तथा संस्थागत क्षेत्रमा भएका उपलब्धि, आगामी कार्ययोजना तथा कलेजको समग्र विकासका लागि भइरहेका प्रयासबारे जानकारी गराएका थिए ।
सभालाई सम्बोधन गर्दै प्रमुख अतिथि, विशिष्ट अतिथि तथा अन्य वक्ताहरूले राष्ट्रिय जनसहयोग कलेजले हासिल गरेको शैक्षिक उपलब्धिको प्रशंसा गर्दै आगामी दिनमा पनि आफ्नो क्षेत्रबाट आवश्यक सहयोग र सहकार्य जारी राख्ने प्रतिबद्धता व्यक्त गरे ।
कार्यक्रममा कलेजले हासिल गरेको उत्कृष्ट नतिजासहित शैक्षिक गुणस्तर सुधारका लागि प्राध्यापक, कर्मचारी, विद्यार्थी, अभिभावक तथा सरोकारवालाको योगदान महत्वपूर्ण रहेकोमा जोड दिइएको थियो ।
बीबीएसको नतिजाले सभामा विशेष चर्चा
हालै प्रकाशित बीबीएस चौथो वर्षको परीक्षाफल सभाको विशेष आकर्षण बनेको थियो । उक्त नतिजामा राष्ट्रिय जनसहयोग कलेजका १२ जना विद्यार्थीले विशिष्ट श्रेणी हासिल गरेको जानकारी गराइएको थियो ।
त्यस्तै, छात्रा प्रतिभा लुइँटेलले ८७.८० प्रतिशत अंक प्राप्त गरेको विषयलाई सभामा विशेष रूपमा चर्चा गरिएको थियो ।
उक्त उपलब्धिलाई सभामा सहभागीहरूले कलेजको शैक्षिक इतिहासकै महत्वपूर्ण उपलब्धिका रूपमा लिँदै विद्यार्थी, क्याम्पस प्रमुख तथा प्राध्यापकहरूलाई बधाई तथा धन्यवाद दिएका थिए ।
क्याम्पस प्रमुख न्यौपानेले उत्कृष्ट नतिजा कुनै एक व्यक्ति वा पक्षको मात्र प्रयासबाट सम्भव नभई कलेज परिवार, विद्यार्थी, अभिभावक, सञ्चालक समिति तथा शुभेच्छुकहरूको सामूहिक प्रयासको परिणाम भएको बताए ।
सभाले आर्थिक वर्ष २०८३।८४ का लागि प्रस्तावित योजना, बजेट तथा कार्यक्रम पारित गरेको छ । त्यसैगरी अघिल्लो वर्षको प्रगति प्रतिवेदन र आर्थिक प्रतिवेदनसमेत छलफलपछि पारित गरिएको कलेजले जनाएको छ ।
कलेजको शैक्षिक गुणस्तरलाई थप मजबुत बनाउने, प्रशासनिक व्यवस्थापन सुधार गर्ने तथा संस्थागत विकासलाई प्रभावकारी बनाउने विषयमा सभामा सहभागीहरूले विभिन्न सुझाव तथा सल्लाह दिएका थिए ।
कार्यक्रममा उत्कृष्ट विद्यार्थी तथा शिक्षकहरूलाई सम्मान तथा पुरस्कारसमेत प्रदान गरिएको थियो । उनीहरूको योगदान र उपलब्धिले कलेजको शैक्षिक वातावरणलाई थप प्रेरणादायी बनाउन सहयोग पुगेको सभामा बताइएको थियो ।
कमला खड्काको संयोजन तथा सभा खगेन्द्र गिरीको अध्यक्षतामा सम्पन्न भएको कार्यक्रममा कलेजको आगामी यात्राका लागि सबै पक्षको निरन्तर सहयोग र सहकार्य आवश्यक रहेकोमा जोड दिइएको थियो ।
Discussion about this post