विराटनगर : विराटनगर महानगरपालिकाका मेयर नागेश कोइरालाले बडादसैं, शुभदीपावली, नेपाल सम्वत् तथा छठ पर्वले सामाजिक सद्भाव, आपसी एकता र राष्ट्रिय एकतालाई थप सुदृढ बनाउनुपर्ने बताएका छन् ।
२०८३ सालको बडादसैं, शुभदीपावली, नेपाल सम्वत् तथा छठ पर्वका अवसरमा शुभकामना सन्देश जारी गर्दै उनले चाडपर्वलाई धार्मिक आस्था र परम्परामा मात्र सीमित नराखी सामाजिक सद्भाव, सहकार्य र मानवीय संवेदना अभिवृद्धि गर्ने अवसरका रूपमा लिन आग्रह गरेका हुन् ।
मेयर कोइरालाले चाडपर्वको वास्तविक खुसी आफू रमाउनुमा मात्र नभई अरूको मुहारमा समेत मुस्कान ल्याउन सक्नुमा रहेको उल्लेख गरेका छन् । उनले विपन्न, असहाय, ज्येष्ठ नागरिक, एकल महिला, अपाङ्गता भएका व्यक्ति तथा समस्यामा परेका नागरिकको खुसीमा साथ दिन आग्रह गरेका छन् ।
चाडपर्वका नाममा हुने भड्किलो खर्च, देखासिकी र अनावश्यक प्रतिस्पर्धालाई निरुत्साहित गर्दै आत्मीयता, सहयोग र सामाजिक उत्तरदायित्वलाई प्राथमिकता दिनुपर्ने उनको भनाइ छ ।
बडादसैं सत्यको विजय, अन्यायमाथि न्यायको स्थापना र सकारात्मक शक्तिप्रतिको विश्वासको प्रतीक भएको उल्लेख गर्दै कोइरालाले यस पर्वले अन्याय, अत्याचार र सामाजिक विकृतिविरुद्ध उभिने प्रेरणा दिने बताएका छन् ।
देवी दुर्गाले महिषासुरमाथि विजय प्राप्त गरेको पौराणिक मान्यताले सत्य, साहस र सदाचारको मार्गमा अघि बढ्न सन्देश दिने उनको भनाइ छ ।
त्यस्तै, शुभदीपावलीले अन्धकारमाथि उज्यालोको विजय र जीवनमा आशाको सञ्चार गर्ने, नेपाल सम्वत्ले मौलिक पहिचान तथा सांस्कृतिक गौरव बढाउने र छठ पर्वले प्रकृति, सूर्य तथा जलप्रतिको सम्मानसँगै श्रद्धा, अनुशासन र समर्पणको भावना अभिवृद्धि गर्ने उनले बताएका छन् ।
नेपाली समाज विभिन्न जातजाति, भाषा, धर्म, संस्कृति र परम्पराले समृद्ध रहेको उल्लेख गर्दै कोइरालाले यस्ता पर्वले विविधताबीचको एकता, सहअस्तित्व र आपसी विश्वासलाई बलियो बनाउने बताएका छन् ।
चाडपर्वले परिवारका सदस्यलाई एकै ठाउँमा जोड्ने, टाढिएका मनलाई नजिक ल्याउने र पुस्तान्तरणमार्फत संस्कार तथा संस्कृति संरक्षणमा योगदान पुर्याउने उनको भनाइ छ ।
विराटनगर महानगरपालिकालाई स्वच्छ, सुन्दर, व्यवस्थित, समुन्नत र समावेशी सहर बनाउने अभियानमा एकता, सहकार्य र सामाजिक सद्भाव अपरिहार्य रहेको कोइरालाले उल्लेख गरेका छन् ।
महानगरको विकास र समृद्धिका लागि नागरिकबीच आपसी विश्वास, सहयोग र साझा जिम्मेवारीको भावना आवश्यक रहेको उनको सन्देश छ ।
उनले चाडपर्वले प्रत्येक घरमा सुख, शान्ति र समृद्धि ल्याउनुका साथै हरेक मनमा आशा र विश्वास जगाओस् भन्ने कामना गरेका छन् ।
साथै, राष्ट्रिय एकता र सामाजिक सद्भावलाई थप मजबुत बनाउँदै देशलाई विकास र समृद्धिको साझा बाटोमा अघि बढ्न सबै पर्वले प्रेरित गर्ने विश्वास व्यक्त गरेका छन् ।
Discussion about this post