धनकुटा : सप्तकोशी नदीमा पानीबोट दुर्घटना हुँदा तीन जनाको मृत्यु भएको छ भने तीन जना बेपत्ता भएका छन् । दुर्घटनामा चालकसहित १२ जनाको उद्धार गरिएको छ ।
धनकुटाको साँगुरीगढी गाउँपालिका–१०, त्रिवेणीस्थित सप्तकोशी नदीमा आइतबार दिउँसो पानीबोट दुर्घटना भएको हो । भोजपुरको हतुवागढी गाउँपालिका–९, कोप्चेबाट सुनसरीको बराहक्षेत्र–चतरातर्फ जाँदै गरेको पानीबोट ब्रेक फेल भएर दुर्घटनामा परेको प्रारम्भिक विवरण छ ।
घटनालगत्तै सुनसरीको महेन्द्रनगरस्थित इलाका प्रहरी कार्यालय चक्रघट्टीबाट खटिएको प्रहरी टोलीले चालकसहित १२ जनाको उद्धार गरी चतरा अस्पताल पठाएको थियो । उपचारका क्रममा तीन जनाको मृत्यु भएको प्रहरीले जनाएको छ ।
मृत्यु हुनेमा सुनसरीको बराहक्षेत्र नगरपालिका–१ की अन्दाजी ५२ वर्षीया लिला राई, नामथर र वतन नखुलेकी अन्दाजी ६–७ वर्षीया बालिका तथा नामथर र वतन नखुलेका अन्दाजी ४०–५० वर्षीय पुरुष रहेका छन् । तीनै जनाको चतरा अस्पतालमा उपचारका क्रममा मृत्यु भएको हो ।
दुर्घटनामा झापाको कन्काई नगरपालिका–४ का अन्दाजी सात वर्षीय शिवक मगर, सुनसरीको बराहक्षेत्र नगरपालिका–१ की २१ वर्षीया प्रमिला मगर र सोही स्थानकी २२ वर्षीया मनु राई बेपत्ता भएका छन् । शिवक, उद्धार गरिएकी निता मगरका छोरा हुन् ।
उद्धार गरिएकामा पानीबोट चालक बराहक्षेत्र–१ का २४ वर्षीय सुमन मगर, भोजपुरको हतुवागढी गाउँपालिका–४ का विष्णु सुनार, तीर्था रसाइली सुनार, पूजा तिरुवा, प्रज्वल तिरुवा, देवेन्द्र राई, रञ्जित राई र मोहन सुनार तथा झापाको कन्काई नगरपालिका–४ की निता मगर रहेका छन् ।
दुर्घटनाका बेला पानीबोटमा चालकसहित १५ जना सवार थिए। बेपत्ताको खोजी तथा उद्धारका लागि नदी क्षेत्रमा प्रहरी र सशस्त्र प्रहरी परिचालन गरिएको छ । जिल्ला प्रहरी कार्यालय धनकुटाबाट प्रहरी उपरीक्षक नारायण रञ्जितकारको कमान्डमा १४ जना र सशस्त्र प्रहरी बल नेपाल नं. ६ गुल्म हेडक्वार्टर धनकुटाबाट सशस्त्र प्रहरी नायब उपरीक्षक राजेश फुयालको कमान्डमा १६ जनाको टोली घटनास्थलमा खटिएको छ ।
बेपत्ता भएकाहरूको खोजी जारी रहेको र दुर्घटनाबारे थप अनुसन्धान भइरहेको प्रहरीले जनाएको छ ।
Discussion about this post