धरान : धरानमा पहिलो पटक आयोजना हुन लागेको फिल्म फेस्टिभलमा सहभागी हुन चाहने चलचित्र निर्माताका लागि आवेदन खुला गरिएको छ ।
बीपीफोर इन्टरटेन्मेन्टले आगामी मङ्सिर २७ र २८ गते आयोजना गर्ने ‘धरान फिल्म फेस्टिभल’ का लागि मङ्गलबारदेखि अनलाइन आवेदन लिन थालेको हो ।
फेस्टिभलमा फिचर फिल्म, लघु चलचित्र र वृत्तचित्रलगायत विभिन्न विधाका चलचित्र समावेश गरिने आयोजकले जनाएको छ । ४० मिनेटसम्मका चलचित्रले आवेदन दिन सक्नेछन् । आवेदनको अन्तिम म्याद मङ्सिर १० गतेसम्म तोकिएको छ ।
फेस्टिभलका निर्देशक तथा आयोजक संस्थाका सञ्चालक विनोद विश्वकर्माका अनुसार चलचित्र निर्माताले आयोजकको आधिकारिक फेसबुक पेजमा उपलब्ध क्यूआर कोड तथा आवेदन लिङ्कमार्फत चलचित्र पठाउन सक्नेछन् ।
धरान फिल्म फेस्टिभलको आधिकारिक वेबसाइट र इभेन्ट व्यवस्थापक इभेन्टलयको वेबसाइटबाट पनि आवेदन दिन सकिनेछ ।
फेस्टिभललाई चलचित्र प्रदर्शनमा मात्र सीमित नराखी चलचित्र क्षेत्रका विभिन्न आयामबारे बहस र अनुभव आदानप्रदान गर्ने मञ्चका रूपमा विकास गर्ने आयोजकको तयारी छ ।
त्यसका लागि चलचित्र कार्यशाला, मास्टरक्लास, चलचित्र पत्रकार र कलाकारबीच अन्तरक्रिया तथा चलचित्र पर्यटनसम्बन्धी प्यानल छलफल आयोजना गरिनेछ ।
त्यस्तै, विशेष चलचित्र प्रदर्शन, विभिन्न क्षेत्रका व्यक्तित्वलाई सम्मान तथा सांस्कृतिक प्रदर्शनीसमेत महोत्सवका आकर्षण रहनेछन् । फेस्टिभलका विभिन्न कार्यक्रम र विधामा सहभागी हुन आवश्यक दर्ता फाराम पनि अनलाइनमार्फत उपलब्ध गराइने आयोजकले जनाएको छ ।
पहिलो पटक आयोजना हुन लागेको फेस्टिभलले धरानमा चलचित्र प्रदर्शन र सिर्जनासम्बन्धी गतिविधि विस्तार गर्नुका साथै चलचित्र पर्यटनको सम्भावनाबारे बहस अघि बढाउने अपेक्षा गरिएको आयोजकको भनाइ छ ।
















Discussion about this post