दीपावलीमा लापरबाही गर्दा मोरङका चार स्थानमा आगलागी भएको छ ।
चारवटै आगलागी भएको स्थानहरूको प्रारम्भिक अनुसन्धान गर्दा दीपावलीको अवसरमा मैनवत्ती तथा दियोबालेर लापरवाहीपूर्वक छाडिएको अवस्थामा आगलागी भएको जिल्ला प्रहरी कार्यालय मोरङले जनाएको छ ।
मोरङ प्रहरीका अनुसार आज बिहान ४ बजेर १५ मिनेटमा मोरङको बेलाबारी ३ मा पनि आगलागी भएको छ ।
सार्वजनिक शौचालयको रेखदेख गर्ने राधा मल्लिकको कोठामा दीपावालीमा बालेको दियोबाट आगो सल्केर आगलागी भएको प्रहरीको भनाई छ । आगालागीबाट कोठाभित्र रहेको फर्निचर, टिभी, फ्रिज लगायत गरी १ लाख बराबरको क्षति पुगेको प्रहरीको प्रारम्भिक अनुमान छ ।
यस्तै, हिजो राती करीब साढे ९ बजे विराटनगर १० ट्राफिक चौक नजिकै विजय शाहको घरमा रहेको फेन्सी पसलमा आगलागी भएको थियो । उक्त फेन्सी पसल दिनेश अग्रवालको हो । आगलागी हुँदा सटर भित्र रहेको फेन्सी कपडा, फर्निचरको सामान गरि अन्दाजी ६० लाख बराबारको सामान जलेर पूर्णरुपमा क्षति पुगेको मोरङ प्रहरीले जनाएको छ ।
त्यस्तै, राती साढे १० बजे बिराटनगर महानगरपालिका वडा नं. ४ राजबंशी चौकमा कमला कोईरालाको बाँस र टिनको छानो भएको बाख्राको खोरमा आगलागी भएको थियो । आगलागीबाट खोर जलेर पूर्ण रुपमा क्षती भएको थियो ।
त्यस्तै, राती नै ११ बजेर २० मिनेटको समयमा विराटनगर ९ बसपार्क नजिक पनि आगलागी भएको थियो ।
स्थानीय अभय अर्यालको बारीमा बाँस र टिनको छाना भएको सिरक डसना बनाउने घरमा आगलागी हुँदा ८ लाख बराबर क्षती भएको प्रहरीले जनाएको छ ।
Discussion about this post